Atyraýda iz-túzsiz joǵalǵan 33 jastaǵy jigit bir aptadan beri tabylmaı jatyr

ATYRAÝ. QazAqparat – Atyraýda iz-túzsiz joǵalǵan 33 jastaǵy jigit bir aptadan beri tabylmaı jatyr, dep habarlaıdy QazAqparat. Oblystyq polıtsııa departamentiniń baspasóz qyzmetiniń málimetine qaraǵanda, joǵalǵan jigit Qyzylqoǵa aýdanyndaǵy Muqyr aýylynan Atyraý qalasyna kelgen. Alaıda 8 tamyzdan beri qaıda júrgeni belgisiz bolyp otyr. Ol sol kúni telefon shalǵan týysyna temirjol stansasy mańynda turǵanyn aıtqan. Sol kúnnen beri iz-túzsiz joǵalyp, habar-osharsyz ketken. Týystarynyń aıtýynsha, 8 tamyzdan beri mobıldi telefony óship tur. Ázirge joǵalǵan jigitten esh derek joq. «Polıtsııa qyzmetkerleri atalǵan derekke baılanysty jedel izdestirý is-sharasyn bastady. Qazir izdestirý jumystary júrip jatyr», – dep málim etti departamenttiń baspasóz qyzmeti. Eske sala ketelik, buǵan deıin Atyraýda tyıym salynǵan jerde shomylǵan er adam Jaıyqqa batyp ketkeni týraly jazǵan bolatynbyz. Atyraý qalasyna taıaý ornalasqan Talqaırań aýylynyń tusynda 58 jastaǵy er adam Jaıyq ózenine shomylǵan. Jedel-qutqarý jasaǵynyń qutqarýshylary onyń arnaıy jabdyqtalmaǵan, tyıym salynǵan jerde sýǵa túskenin anyqtady. Qutqarýshylar sýasty izdestirý jumysyn júrgizip, sýǵa batqan adamnyń denesin 2 saǵattan soń tapty. «Bıyl jyl basynan beri Atyraý oblysynyń sý aıdyndarynda 11 adam sýǵa batyp ketti. Onyń ishinde kámeletke tolmaǵan 3 bala bar. Qutqarýshylar sý aıdyndarynan 6 adamdy qutqaryp qaldy. Qutqarylǵandardyń bireýi – bala», - dep málim etti departamenttiń qoǵammen baılanys tobynan.