Atyraýda iz-túzsiz ketken jylqyshynyń denesi tereń shuńqyrdan tabyldy
ATYRAÝ. QazAqparat – Atyraý oblysynyń polıtseıleri iz-túzsiz joǵalyp ketken jylqyshyny óltirgen kúdiktini ustap, qoǵamda daý týǵyzǵan qylmysty ashty, dep habarlaıdy QazAqparat.
Buǵan deıin 6 qyrkúıekte Jylyoı aýdanynyń 47 jastaǵy turǵyny jylqylaryn izdeýge shyǵyp, iz-túzsiz joǵalyp ketken edi. Atalǵan fakti boıynsha Atyraý oblystyq polıtsııa departamentiniń qyzmetkerlerinen jedel-tergeý toby quryldy.
Joǵalǵan azamattyń júrgen jerin anyqtaý úshin polıtsııa jáne tótenshe jaǵdaılar departamentteriniń qyzmetkerleri, sondaı-aq eriktiler dalalyq aýmaqty aralap, izdeý jumystary jan-jaqty júrgizildi.
«Búgin, 14 qyrkúıekte polıtsııa qyzmetkerleri Jylyoı aýdanyndaǵy Qulsary qalasynan 100 shaqyrym jerdegi Qyryqmyltyq ken alańy mańynda 15-20 metr tereńdiktegi shuńqyrdan joǵalǵan azamattyń óli denesin tapty. Osy derekke qatysty saraptama taǵaıyndaldy. Atalǵan qylmysqa kúdikti Jylyoı aýdanynyń 38 jastaǵy turǵyny ustaldy. Kúdikti buryn sottalǵan. Qazir QR Qylmystyq Kodeksiniń 99-babymen sotqa deıingi tergeý júrip jatyr. Tergeý kezinde qylmystyń sebebi anyqtalady» dep habarlady oblystyq polıtsııa departamentiniń baspasóz qyzmeti.
