Atyraýda ıttiń moınyna kirpish baılap, Jaıyq ózenine laqtyryp ketken

ATYRAÝ. QazAqparat – Atyraýda ıttiń moınyna kirpish baılap, Jaıyq ózenine laqtyryp ketken. «Dobroe serdtse» qorynyń kınology, volonter Mamýchar Djabasovtyń aıtýynsha, dabyldy oqıǵaǵa kýá bolǵandar qaqqan, dep habarlaıdy QazAqparat tilshisi.

«Birden Jaıyq ózeniniń jaǵasyna jettik. Ittiń jaǵada jatqanyn kórdik. Onyń moınyna uzyn jippen kirpish tas baılanǵan. Sýdan qalaı shyqqany belgisiz. Biraq, ıt tiri bolǵanymen, esh qozǵalyssyz jatty. Soǵan qaraǵanda, sýdan shyǵý úshin biraz arpalysqan bolýy kerek. It kishkentaı, biraq ony kóterip, jaǵadan árirek áketý qıynǵa tústi. Ony kótergen sebebimiz, janýardyń aıaǵy da baılanǵan», - deıdi Mamýchar Djabasov.

Volonterler ıtti dereý úıge ákelip, barlyq qajetti reanımatsııalyq protsedýralardy jasaǵan. Keıin ıt tamaqtana bastaǵan. Biraq, áli tura almaıdy.

Atyraýda mundaı jaıt alǵash bolyp otyrǵan joq. Úsh jyl buryn Atyraý turǵyny ıttiń moınyn tońazytqyshtyń esigine qysyp, azaptaǵan tuǵyn. Keıin sol janýardy AQSh azamaty asyrap alǵan edi. AQSh, Frantsııa, Kanada, Reseı azamattarynan ıtti asyrap alýǵa usynys túsken. Jergilikti volonterler ıtti Lakı dep ataǵan. Tórt aıaqtynyń jańa qojaıyny ony Kalıfornııa shtatyna ushaqpen aldyrǵan.

Keıin Atyraýda kóligimen ıt súıregen júrgizýshi týraly jazǵan bolatynbyz.