Atyraýda ıtti qorlyqpen óltirýdiń taǵy bir oqıǵasy tirkeldi
ATYRAÝ. QazAqparat –Atyraý oblysynda ıtke qatygezdik kórsetýdiń taǵy bir oqıǵasy tirkeldi, dep habarlaıdy QazAqparat.
Oqıǵa keshe, 7 maýsymda Inder aýdanyndaǵy Kóktoǵaı aýylynda bolǵan.
«Aýyl turǵyny kórshisiniń ıtin aýyl sharýashylyǵy quralymen soǵyp óltirgeni anyqtaldy. Aýdandyq polıtsııa qyzmetkerleri qylmystyq quqyq buzýshyny ustady. Úı janýaryna qatygezdik tanytyp, óltirgen azamat ýaqytsha oqshaýlaý ornyna qamaýǵa alyndy. Jınaqtalǵan is-qujattary qysqa merzimde sotqa joldanatyn bolady», - dep habarlady oblystyq Polıtsııa departamentiniń baspasóz qyzmetinen.
Eske salaıyq, buǵan deıin Atyraý oblysynda ıtti qorlaýǵa qatysty 2 qylmystyq is qozǵalǵan bolatyn. Birinshi oqıǵa 30 mamyrda Atyraý qalasynyń mańyndaǵy «Bereke» shaǵynaýdanynda boldy. Onda er adam kóshedegi ıtti myltyqpen atqan. Al 31 mamyr kúni Erkinqala kentinde 32 jastaǵy azamat ıttiń moınyn tońazytqyshtyń esigine qysyp, tunshyqtyrǵan bolatyn.
Al Soltústik Qazaqstan oblysynyń Petropavl qalasynda 45 jastaǵy áıel ıtin tórtinshi qabattaǵy terezeden laqtyryp jibergen. Sotqa deıingi tergeý júrgizilip, oǵan 10 AEK mólsherinde aıyppul salyndy.
Al Almaty Almaty oblysynyń Alakól aýdanynda eki oqýshy bala qapqa salynǵan kúshiktiń ústine benzın quıyp, ony tirideı órtegen bolatyn.
