Atyraýda ıtti qaǵyp ketken júrgizýshi jaýapqa tartyldy
ATYRAÝ. QazAqparat - Atyraýda mamandandyrylǵan ákimshilik sot ıtti qaǵyp ketken kólik júrgizýshisine úkim shyǵardy, dep habarlaıdy «QazAqparat» HAA tilshisi.
«Sottyń anyqtaýynsha, «Gaz 3302-288» markaly kólikti basqarǵan júrgizýshi D. Avangard shaǵynaýdanyndaǵy №1 úı aldynda ıtti qaǵyp ketken. Joker esimdi ıt zardap shegýshi G.-niń úı janýary bolǵan. Sot otyrysynda quqyqbuzýshy óz aıybyn tolyq moıyndady jáne ıt qojaıynyna barlyq materıaldyq shyǵyndy óteıtinine sóz berdi.
Sot qaýlysymen D. qozǵalys qaýipsizdigin qamtamasyz etý erejelerin buzýda kináli dep tanyldy. Oǵan 14 847 teńge kóleminde ákimshilik aıyppul salyndy», - dep habarlady oblystyq sottyń baspasóz qyzmetinen.
