Atyraýda ıt atylǵany jóninde jalǵan qujatpen kásipkerge aqsha aýdarylǵan
Atyraý qalasynyń prokýratýrasy anyqtaǵandaı, veterınarııa organdary ıt atylǵany jóninde jalǵan qujattar usynǵan. Jalǵan qujat arqyly kásipkerge bıýdjetten qarajatyn aýdarý faktisine baılanysty tıisti qadaǵalaý aktisi engizilgen.
Bıýdjetke keltirilgen zalal tolyqtaı ótelip, jaýapty tulǵalar qatań tártiptik jaýapqa tartylǵan.
«Sońǵy kezde Atyraý qalasynda ıtterdiń adamdarǵa, ásirese, kámeletke tolmaǵandarǵa shabýyldaýy jıiledi. Bıylǵy jyl basynan 112 adamdy ıt qabý deregi tirkeldi. Onyń ishinde kámeletke tolmaǵan 70 jasóspirim bar. Osyǵan baılanysty qala prokýratýrasy ýákiletti organdardyń tarapynan buralqy ıtterdi aýlaý baǵytyndaǵy jumystyń nátıjesizdigine, «Janýarlarǵa jaýapkershilikpen qaraý týraly» Zańynyń tıisti oryndalmaýyna baılanysty usynys engizdi. Sonyń nátıjesinde prokýratýra, polıtsııa jáne jergilikti atqarýshy organdar qyzmetkerlerinen arnaıy mobıldi top qurylyp, keshendi sharalar jospary bekitildi», - dedi qalalyq prokýratýradan.
Alaıda, qabyldanǵan sharalarǵa qaramastan, adamdardy ıt qaýyp alý deregi áli de tyıylǵan joq. Sol sebepten, prokýratýra ata-analarǵa balalaryn qoǵamdyq oryndarda erekshe baqylaýǵa alý qajettigin eskertip otyr.
Al Atyraý qalasynyń prokýrory janýarlardy qorǵaý salasyndaǵy zańnamanyń saqtalýyn, onyń ishinde buralqy ıtterdi aýlaý máselesin jeke baqylaýyna aldy.
Eske sala ketelik, budan buryn Atyraýda qańǵybas ıt talaǵan 5 jasar qyz aýrýhanaǵa jetkizilgenin habarlaǵan bolatynbyz.
