Atyraýda isker áıelder medıtsına men polıtsııa qyzmetkerlerine 6,5 mln teńge jınady

ATYRAÝ. QazAqrarat –Atyraýda isker áıelder «MEIRIM SHUAGY» aktsııasy aıasynda 130 medıtsına jáne polıtsııa qyzmetkeriniń árqaısysyna syıaqy úshin 6,5 mln teńge jınap berdi, dep habarlaıdy, QazAqparat.

Óńirlik kommýnıkatsııalar qyzmetiniń málimetinshe, qaıyrymdylyq aktsııasyn Atyraý oblysynyń qurmetti azamaty Rashılıa Mursálıeva uıymdastyrǵan. Sharaǵa oblys ákimi janyndaǵy Áıelder isi jáne otbasylyq-demografııalyq saıasat jónindegi komıssııanyń músheleri men eńbek ardagerleri, qoǵam belsendileri men Isataı, Mahambet, Qyzylqoǵa jáne Inder aýdandarynyń isker áıelderi atsalysqan.

–Biz «MEIRIM SHUAGY» aktsııasyn qolǵa alyp, qaýipti indetpen kúrestiń alǵy shebinde júrgen medıtsına jáne polıtsııa qyzmetkerlerine qoldaý kórsetýdi kózdedik. Aktsııaǵa ún qosqandardan on kúnde 6 mln 500 myń teńge jınaldy. Bul qarjyny medıtsına salasynyń 100 qyzmetkerine, sondaı-aq 30 polıtsııa qyzmetkerine 50 myń teńgeden aýdardyq. Óıtkeni, olar qaýipti indettiń taralyp ketpeýi úshin óz ómirin táýekelge tigip, otbasyna barmaı, kúni-túni jumys isteýde. Olardyń damylsyz eńbegine ózimizdiń qurmetimizdi, qoldaýymyzdy osylaı bildirýdi jón kórdik, -dedi qoǵam qaıratkeri Rashılıa Mursálıeva.

Onyń aıtýynsha, aktsııa barysynda «Ónerpaz» JShS tigin tsehynda 1000 dana medıtsınalyq maska tigilip, tegin taratylǵan.