Atyraýda iship alǵan er adam tún ortasynda kópirden sekirmek bolǵan

ATYRAÝ. QazAqparat – Atyraýda alkogoldi ishimdik ishken er adam tún ortasynda kópirden sekirmek bolǵan. Polıtsııa qyzmetkerleri sýıtsıd jasamaq bolǵan jigitti raıynan qaıtardy, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń aqparatyna qaraǵanda, oqıǵa búgin, 21 tamyzda saǵat 2:45-te tirkelgen.

«Búgin túnde 102 operatoryna Atyraý qalasyndaǵy «Jumysker-Balyqshy» kópiriniń ústinde áldekimniń Jaıyq ózenine sekirgeli turǵany týraly habar tústi. Bul derekti jedel basqarý ortalyǵynyń qyzmetkerleri radıoqabyldaǵysh arqyly qaýipsizdikti qadalaǵap júrgen ekıpajdarǵa jetkizgen. Atalǵan kópirge jaqyn mańda júrgen «Batys-24» ekıpajynyń qyzmetkerleri, polıtsııa aǵa leıtenanty Temirlan Sahıpollaev pen polıtsııa kapıtany Damır Amanov jedel jetti. Polıtsııa qyzmetkerleri óz-ózine qol salmaq nıetpen kópirden sekirmek bolǵan 33 jastaǵy er adamdy anyqtady», -dep habarlady departamenttiń baspasóz qyzmetinen.

Sýıtsıd jasaýǵa umtylǵan jigit – Atyraý qalasynyń turǵyny. Jedel áreket etken polıtseıler onymen profılaktıkalyq kelissóz júrgizip, raıynan qaıtardy.

Polıtsııa qyzmetkerleri er adamdy medıtsınalyq saraptamadan ótkizýge sheshim qabyldady. Saraptama qorytyndysyna sáıkes, onyń alkogoldik ishimdik ishkeni, jeńil dárejede mas ekeni dáleldendi.

Eske sala ketelik, buǵan deıin Atyraýda túngi klýbtyń aldynda tóbelesken qyzdardyń isi sotqa joldanǵanyn habarlaǵan edik.