Atyraýda ishimdikke salynǵan áıel ata-analyq quqyǵynan aıyryldy
Oblystyq polıtsııa departamenti baspasóz qyzmetiniń málimetinshe, jyl basynan beri 70 ata-anaǵa QR Ákimshilik quqyq buzý kodeksiniń 127-babymen ákimshilik hattama toltyrylǵan.
Bala tárbıesimen aınalyspaǵany úshin 2 zańdy ókildiń ata-analyq quqyǵy shektelgen. Al, 3 zańdy ókil osyndaı quqyqtan aıyrylǵan.
«Atyraý qalalyq polıtsııa basqarmasy ıývenaldy polıtsııa bólimshesiniń ınspektorlary bul ata-analardyń bala tárbıeleý jáne oǵan bilim berý, onyń quqyqtary men múddesin qorǵaý jónindegi mindetterin oryndamaǵanyn anyqtady. Sondaı-aq, qalalyq ákimdik janyndaǵy kámeletke tolmaǵan balalardyń quqyǵyn qorǵaý jónindegi komıssııaǵa jasóspirimderdiń tárbıesimen aınalyspaǵan ata-analarǵa jáne qańǵybastyqqa beıim jasóspirimderge qatysty 40-qa jýyq is-qujat joldandy», -dep habarlady departamenttiń baspasóz qyzmeti.
Belgili bolǵandaı, Atyraý qalalyq ákimdigi janyndaǵy atalǵan komıssııanyń kezekti otyrysynda bala tárbıesimen aınalyspaǵan 7 zańdy ókildiń is-qujattary qaraldy.
Onyń ishinde spırttik ishimdikke áýes 40 jastaǵy azamatsha bar.
«Bul áıeldiń tórt balasy bar. Tuńǵyshy – 18, kenjesi 9 jasqa tolǵan. Atalǵan azamatsha ishki ister organdarynda jaısyz otbasy esebinde turady. Osy kezge deıin bir mekemede turaqty jumys istemegen. Polıtsııa qyzmetkerleri atalǵan azamatshaǵa qatysty is-qujattardy kámeletke tolmaǵandardyń quqyǵyn qorǵaý jónindegi komıssııaǵa birneshe ret joldaǵan. Alaıda, 40 jastaǵy azamatsha alkogoldik ishimdik ishýin toqtatpaǵan. Balalarynyń tárbıesimen aınalyspaı, túzelý jolyna túspegen. Al, anasynyń osyndaı jolda júrgeniniń kesirinen jasóspirim balalary birneshe ret qylmys jasaǵan», -dep málim etti baspasóz qyzmetinen.
Komıssııa músheleri atalǵan áıeldi ata-analyq quqyǵynan aıyrýǵa qaýly shyǵardy.
Eske sala ketelik, budan buryn Atyraýda balalarynyń kózinshe ishimdik ishken áıeldiń quqyǵy shekteletinin habarlaǵan bolatynbyz.
