Atyraýda ishimdik ishken sheteldik 15 táýlikke qamalyp, júrgizýshi kýáliginen aıryldy
Atyraý oblystyq polıtsııa departamentiniń baspasóz qyzmetinen málim etkendeı, sheteldikterdiń 23 maýsymda jol erejesin óreskel buzǵany anyqtalǵan.
«Atyraý qalasynyń aýmaǵynda qoǵamdyq tártipti saqtaý, shetelden kelýshiler tarapynan jasalatyn quqyq buzýshylyqtardyń aldyn alý maqsatynda «Mıgrant» jedel-profılaktıkalyq is-sharasy ótkizilip jatyr. Іs-shara kezinde patrýldik polıtsııa batalonynyń qyzmetkerleri 23 maýsymda jol qozǵalysy erejelerin óreskel buzǵan 3 sheteldikti anyqtady. Olardyń biri – Ózbekstan Respýblıkasynyń 48 jastaǵy azamaty shahardaǵy Qurmanǵazy kóshesinde VAZ-21043 avtokóligimen toqtatyldy. Kólik rýlindegi sheteldik júrgizýshiniń jeńil dárejede mas ekeni medıtsınalyq kýálandyrý qorytyndysymen dáleldendi. Oǵan qatysty QR Ákimshilik quqyq buzýshylyq týraly kodeksiniń 608-baby 1-bóligine sáıkes hattama toltyryldy», - dep habarlady departamenttiń baspasóz qyzmeti.
Jınaqtalǵan is qujattary Atyraý qalasynyń ákimshilik quqyq buzýshylyqtar jónindegi mamandandyrylǵan sotyna joldandy. Sottyń sheshimimen Ózbekstan Respýblıkasynyń azamaty 7 jylǵa kólik quralyn júrgizý quqyǵynan aıyrylyp, 15 táýlikke ákimshilik qamaqqa alyndy.
Ózge eki sheteldikte jeke basyn anyqtaıtyn qujattary bolmaǵan. Soǵan baılanysty olar Atyraý qalalyq polıtsııa basqarmasynyń qabyldap-taratý ornyna ornalastyryldy.
Eske sala ketelik, budan buryn Atyraýda mas júrgizýshiniń biri 20 kúnge qamalyp, ekinshisi 7 jylǵa júrgizýshi kýáliginen aıyrylǵanyn jazǵan bolatynbyz. Er adam Skoda Octavia avtokóligin orta dárejeli mas kúıde júrgizgen. Onyń júrgizýshi kýáligi bolmaǵan. Sol sebepten, ol 20 kúnge qamaýǵa alyndy. Al, Mahambet aýdanynda turatyn 35 jastaǵy áıel 7 jylǵa júrgizýshi kýáliginen aıryldy. Ol da rýlge mas kúıde otyrǵan.
