Atyraýda ishimdik iship alyp, ózin óltirmek bolǵan 33 jastaǵy turǵyn qutqaryldy
ATYRAÝ. QazAqparat – Atyraýda polıtsııa qyzmetkeri sýıtsıd jasamaq bolǵan er adamdy qutqaryp qaldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, Atyraý qalasyndaǵy «Nursaıa» shaǵyn aýdanynda turatyn 33 jastaǵy turǵyn ózine qol salmaq bolǵan.
Ony áıeli kórip qalyp, 102 nómirine qońyraý shalǵan.
«Aýmaqqa bekitilgen ýchaskelik polıtsııa beketiniń qyzmetkerleri ishimdik ishken kúıinde ózine qol jumsaýǵa árekettengen er adamdy qutqardy. Ýchaskelik polıtsııa ınspektorlary qutqarylǵan azamatpen, onyń otbasy múshelerimen profılaktıkalyq túsinik jumysyn júrgizdi» dep habarlady departamenttiń baspasóz qyzmetinen.
Eske sala ketelik, Atyraýda Konstıtýtsııa qurdasy Alan Turlanovtyń týǵan kúninde 5 adamdy órtten qutqarǵanyn jazǵan bolatynbyz.
