Atyraýda Isataı men Mahambet alańyn qaıta jóndeý jumystary bastaldy
ATYRAÝ. QazAqparat - Atyraýda Mahambet Ótemisuly men Isataı Taımanov alańyn qaıta jóndeý jumystary bastaldy. Jóndeý jumystary 2019 jyly aıaqtalady dep josparlanǵan. Bul týraly QazAqparat Atyraý oblystyq óńirlik kommýnıkatsııalar qyzmetine silteme jasap habarlaıdy.
Búgingi kúnde alań tolyq qorshalyp, jumysshylar eski jabdyqtardy alyp jatyr. Joba aıasynda óńirdegi jer qoınaýyn paıdalanýshylardyń qarjylandyrýymen, barlyq eskirgenderdi jańartý jáne joıý kózdelip otyr.
«Mahambet pen Isataı eskertkishi qaıta jańartylatyn bolady. Sonymen qatar, alty basseın jáne sýburqaq ornatylady. Mramorlyq dombyra túrindegi arhıtektýralyq kompozıtsııa ornatylyp, altyn tústes áshekeılermen bezendirilip, sáýlettik shyǵarmashylyqtar ornatylady. Alań qaıta jóndeýden ótkennen keıin qalanyń kórikti jerleriniń biri bolmaq»- deıdi Atyraý oblystyq qurylys basqarmasynyń jobalaý-smetalyq qujattamasy bóliminiń basshysy Aqtilek Musaǵalıev.
Aıta keteıik, kelesi jyly ortalyq alań jasyl jelekke bólenedi. Aýdan aýmaǵynda eki aýqymdy arhıtektýralyq kompozıtsııalar men oryndyqtar ornatylady. Turǵyndar men qonaqtardyń demalýyna jaǵdaılar jasalady.
