Atyraýda ıpotekalyq turǵyn úıge iri qurylys salýshylar tartylýda
ASTANA. QazAqparat - Atyraýda ıpotekalyq turǵyn úı salýǵa iri qurylys salýshylar tartylýda. Bul týraly Atyraý qalasynyń ákimi Serik Shapkenov "BI Group" kompanııalar tobynyń "Zaman" turǵyn úı kesheni qurylysynyń tanystyrylymynda aıtty, dep habarlaıdy Atyraý oblystyq óńirlik kommýnıkatsııalar qyzmeti.
Shahar basshysy jergilikti atqarýshy bılik bıznes júrgizýdi tıimdi etý arqyly Atyraýdyń aımaqtyń ınvestıtsııalyq tartymdylyǵylyǵyn arttyrýǵa barlyq jaǵdaı jasap otyrǵanyn aıtty.
«Memleket basshysynyń tapsyrmasyna sáıkes oblys basshylyǵy jergilikti atqarýshy organdar aldyna ınvestıtsııa tartý, kásipkerlik sýbektilerin kóbeıtýge qatysty naqty mindetter qoıyp otyr, - dedi Serik Shapkenov.- Osy baǵytta qol jetkizgen tabystarymyz da bar, jyl sanap kóptegen iri kompanııalar Atyraýǵa qyzyǵýshylyq tanytyp keledi, olar aımaqtyń ınvestıtsııalyq tartymdylyǵyn basa aıtady».
Shapkenovtyń aıtýynsha, 2017 jyly Atyraý qalasynda 20 kóp qabatty turǵyn úı, 1020 páter salynǵan. 2018 jyly osy kórsetkishti 38 úı, 3678 páterge jetkizý josparlanyp otyr.
«Jeke salýshylardyń úılerine aıryqsha kóńil bólinedi, olar salǵan páterler "Nurly jer", "7-20-25" ıpotekalyq nesıeleý baǵdarlamasy boıynsha beriledi, - dedi qala ákimi. - Qurylys salýshylar qatarynda BI Group kompanııalar toby da bar, Astana, Almaty qalalarynan keıin Atyraýda fılıal ashyp, qurylyspen aınalysýda. Kompanııa temir-beton buıymdary zaýytyn salyp, aımaqtyń áleýmettik-ekonomıkalyq damýyna oń yqpal etpek».
