Atyraýda ınfraqurylym jelilerimen qamtýǵa 3,1 mlrd teńge bólindi
Atyraý qalalyq qurylys bóliminiń bas mamany Nurbolat Bólekovtiń deregine súıensek, bólingen qarjyǵa magıstraldy, ınjenerlik-kommýnıkatsııalyq ınfraqurylymmen qamtıtyn jelilerdiń qurylysy júrgiziledi.
«Atyraý qalasyna taıaý ornalasqan Talǵaıran eldimekeninde 1080 páterlik 24 turǵyn úıdiń qurylysy aıaqtalyp, ishki árleý jumystary jalǵasýda. Qazir 630 páteri bar 9 qabatty 7 úıdiń qurylysy bastaldy. Aldaǵy jyly kópqabatty 39 turǵyn úıdiń qurylysyn salý josparlanyp otyr. Kópqabatty turǵyn úılerdi qamtıtyn alańishilik, sý, káriz, gaz, elektr jáne baılanys jelileri tartylyp jatyr. Munda sý kóterý jáne káriz stansa iske qosylady. Jańa qalashyqty abattandyrý, alańishilik joldar, balalarǵa arnalǵan oıyn, sport alańdary men jaıaý júrginshiler jolaǵy salynyp jatyr. Qýattylyǵy 110/10 kVt quraıtyn elektr jnergııasymen qamtıtyn stansasy qúrylysy bastaldy. Buǵan qosa 14 shaqyrymdy quraıtyn baılanys jelisin tartý júrgizilýde», -dep habarlady Nurbolat Bólekov.
Onyń aıtýynsha, Bereke eldimekenindegi 53, Zaroslyı eldimekeninde 31 kósheniń elektr jelisi qaıta jańartylady. Sondaı-aq, bıyl Qaınar, Juldyz, Zaroslyı, Tasqala, Aqsaı shaǵyn aýdandarynda ınjenerlik-kommýnıkatsııalyq ınfraqurylymnyń qurylys jumystary bastaý kózdelgen. Osyǵan baılanysty jobalyq-smetalyq qujaty daıyndalyp, saraptamanyń oń qortyndysy alynǵan. Endi qarjy bólý máselesi qarastyrylyp jatyr.
Eske sala ketelik, budan buryn Atyraýda jylý jelisiniń jartysynan astamy tozǵanyn jazǵan bolatynbyz.