Atyraýda ınfektsııalyq tósek-oryn sany 1570-ke deıin ulǵaıady
ATYRAÝ. QazAqparat –Atyraýda koronavırýstyń ekinshi tolqyny bastalsa, ınfektsııalyq oryndar sany 1570-ke deıin ulǵaıady, dep habaraıdy QazAparat.
Oblystyq densaýlyq saqtaý basqarmasynyń bólim basshysy Nına Ospanovanyń aıtýynsha, qazir óńirdegi epıdemıologııalyq ahýaldyń turaqtanýyna baılanysty 520 ınfektsııalyq oryn jumys istep tur.
Onyń ishinde 315 ınfektsııalyq kereýet Teńiz kenishinde ashylǵan.
«Búgingi tańda Teńiz kenishiniń ınfektsııalyq statsıonarynda 174 adam em qabyldaýda. Oblystyq juqpaly aýrýlar aýrýhanasynda 38 naýqas koronavırýs ınfektsııasynan emdelip jatyr. Ekinshi tolqyn bastalar bolsa, ınfektsııalyq oryndar sanyn 1570-ke deıin ulǵaıtý, reanımatsııalyq tósek-oryndy 90 kereýetke deıin jetkizýdi josparlap otyrmyz. Sonyń ishinde Teńiz ken ornynda qosymsha 400 ınfektsııalyq oryn ashý kózdelýde» deıdi Nına Ospanova.
Onyń aıtýyna qaraǵanda, pandemııanyń birinshi tolqynynda oblysta 1170 ınfektsııalyq oryn ashylǵan.
Eske sala ketelik, budan Teńiz kenishinde bir táýlikte 42 jumysshy indet juqtyrǵanyn habarlap edik.
