Atyraýda ınfektsııalyq statsıonar qyzmetkerleri qonaqúılerge ornalastyrylady
ATYRAÝ. QazAqparat - Atyraýda ınfektsııalyq statsıonarlarda jumys isteıtin medıtsına qyzmetkerleri qonaqúılerge ornalastyrylady, dep habarlaıdy QazAqparat.
Búgin Atyraý oblysy ákiminiń orynbasary Baqytgúl Hamenova №2 Atyraý oblystyq aýrýhanasynyń (ınfektsııalyq statsıonar) jumysymen tanysty. Onyń sózinshe, medıtsına qyzmetkerleriniń eren eńbegi aımaq basshysynyń aıryqsha nazarynda. B.Hamenova dárgerlerdiń qaýipti vırýstyń taralmaýy men naýqastardy emdeý jolyndaǵy jumysyn atap ótip, alǵys bildirdi.
«Oblys ákiminiń tapsyrmasyna sáıkes, dárigerlerge qolaıly jaǵdaı jasaý úshin olardy «Shaǵala» qonaqúıine ornalastyrý sheshimi qabyldandy. Munda 200 medıtsınalyq qyzmetker qonystana alady. COVID-19-ǵa qarsy kúreste aldyńǵy sheptegi adamdar kún saıyn naýqastarǵa kómek kórsetý úshin óz bilimi men kúsh-jigerin jumsaıdy. Bizdiń mindetimiz, olarǵa qıyn kezekshilikten keıin jaqsy jaǵdaıda demalýǵa múmkindik jasaý», - dedi Baqytgúl Hamenova.
Búginnen bastap 63-ke jýyq dáriger, juqpaly aýrýlar aýrýhanasynyń medbıkeleri, oblystyq aýrýhananyń 70-ke jýyq medıtsınalyq qyzmetkeri qalaýlary boıynsha «Shaǵala» qonaqúıindegi jaıly oryndarǵa ornalastyrylady. Sondaı-aq, aq halattylarǵa «Dana» jáne «Prestıj» qonaqúılerinen de qosymsha kerýetter daıyndalǵan.
Oblys ákiminiń orynbasary sonymen qatar QR Bas sanıtarlyq dárigeriniń qaýlysyna sáıkes óńirdegi medıtsınalyq mekemelerde sanıtarlyq talaptar kúsheıtiletinin atap ótti.
«Naýqastarmen baılanysta bolatyn dárigerlerdiń qaýipsizdigi úshin aýrýhana ǵımaratyn taza jáne las aımaqtarǵa bólý qajet. Beınebaqylaýdy qamtamasyz etý maqsatynda óńir aýrýhanalarynda búginde 100-ge jýyq beınekamera ornatylǵan. Basty talap - olardyń sanyn arttyrý. Sondaı-aq, Qazaqstannyń bas sanıtarlyq dárigeriniń talaptaryna sáıkes Bepıdemıologııalyq jaǵdaıdy turaqtandyrý úshin basqa da baǵyttardy kúsheıtý qajet», - dep atap ótti Baqytgúl Hamenova.
Prezıdenttiń tapsyrmasyna sáıkes medıtsına qyzmetkerlerin qoldaý Atyraý oblysynda da júzege asyrylýda. Koronavırýs ınfektsııasyn juqtyrǵandardy emdep jatqan barlyq dárigerler ústemaqylaryn tolyq kólemde aldy.
