Atyraýda Inderbor kenti karantınge jabyldy

ATYRAÝ. QazAqparat – Atyraý oblysyndaǵy Inder aýdanynyń ortalyǵy – Inderbor kenti 2 shildege deıin karantınge jabyldy, dep habarlaıdy QazAqparat.

Bul týraly Inder aýdanynyń bas memlekettik sanıtarlyq dárigeri Sholpan Erjanovanyń qaýlysynda aıtylǵan.

«Inderbor kenti aýmaǵynda 2020 jyldyń 2 shildesine deıin karantındik shekteý sharalary jarııalansyn. Inderbor kenti aýmaǵyna aýdan ortalyǵynda jumys jasaıtyndardy, shuǵyl medıtsınalyq kómekke júgingenderdi qospaǵanda, aýdan aýmaǵyndaǵy aýyldyq okrýgterden, basqa da qalalar men aýdandardan kólikterdiń, azamattardyń kirip-shyǵýyna tyıym salynsyn. Inderbor kentiniń kireberisterine blokpostar qoıylsyn» delingen qujatta.

Qaýlyǵa sáıkes, oıyn-saýyq, sporttyq jáne basqa da buqaralyq is-sharalardy, sondaı-aq otbasylyq, eske alý sharalaryn (banketter, úılený toılary, mereıtoılar, as berýler), sonyń ishinde úıde jáne adamdar kóp jınalatyn ózge de is-sharalardy ótkizýge, qoǵamdyq oryndarǵa, onyń ishinde alańdarǵa, saıabaqtarǵa, jaǵalaýlarǵa barýǵa, menshik nysanyna qaramastan barlyq mektepke deıingi balalar uıymdarynyń, dinı nysandardyń qyzmetine jáne halyqtyń onda barýyna tyıym salynǵan.

Budan buryn Atyraýda karantındik shekteý qaıta kúsheıtildi.