Atyraýda Hıýaz Dospanova týraly fılm kórsetildi
ATYRAÝ. QazAqparat - Atyraýda oblystyq mýzeıde Hıýaz Dospanovaǵa arnalǵan fılm kórsetildi, dep habarlaıdy QazAqparat tilshisi.
Oblystyq tarıhı-ólketaný mýzeıiniń dırektory Rashıda Harıpovanyń aıtýynsha, Ekinshi dúnıejúzilik soǵys jyldaryndaǵy ekspozıtsııalyq zal surapyl sátterdi sýretteıdi. Atyraý oblysynan (burynǵy Gýrev) Otan qorǵaýǵa óz erkimen 42509 adam, onyń ishinde Atyraý qalasynan 11302 adam maıdanǵa attansa, onyń 15364 adamy oralmaǵan.
Soǵystyń aıaqtalǵanyna 65 jyl tolýyna oraı jasaqtalǵan ekspozıtsııalyq zal Brest qorǵany, Máskeý, Stalıngrad, Lenıngradty qorǵaýǵa qatysqan atyraýlyqtar, soǵys kezindegi Atyraý (Gýrev) evakogospıtaldary men jaıaý ásker ýchılışesi, atyraýlyq Keńes Odaǵynyń batyrlary, Halyq Qaharmany H.Dospanova, Dańq ordeniniń tolyq ıegerleri, Uly Otan soǵysynyń ardagerlerine arnalǵan. Sonymen qatar vıtrınalarǵa soǵys jyldaryndaǵy baspa ónimderi, fotosýretter, baılanys quraldary, maıdandyq hattar, qujattar, tyl eńbekkerleriniń jeke zattary ornalastyrylǵan.
Qazaqtyń dańqty batyr qyzynyń biri de biregeıi - Hıýaz Qaıyrqyzy Dospanova. Ol - Gýrev oblysynyń Qurmanǵazy aýdanynda 1922 jyly dúnıege kelgen. Negizi, aty qujat boıynsha Hyıýaz dep jazylǵan. Orta mektepti Oral qalasynan bitiredi. Mektep qabyrǵasynda júrgende-aq aeroklýbqa qatysyp, ushqysh kásibiniń alǵashqy daıyndyq satylarynan ótedi.
Hıýaz bilim izdep Máskeý qalasyna jol tartady. Dám buıyryp, Máskeýdiń 1-shi medıtsınalyq ınstıtýyna oqýǵa túsedi. Sodan soǵys bastalǵan kezde elge barmaı, Máskeýde «Metrostroıda» jumys isteıdi. Bir kúni ataqty Marına Raskovanyń qyz-kelinshekterdiń avıapolkin qurǵaly jatqanyn estip, aldyńǵylardyń biri bolyp tilek bildiredi. Tilegi qabyl bolyp, Saratovtyń áskerı áýe ýchılışesine oqýǵa jiberiledi. 1942 jyldyń kókteminde avıatsııa tarıhynda tuńǵysh ret qurylǵan áıelder avıapolkiniń quramynda maıdanǵa attanady. Bul negizinen túngi mezgilde jaý pozıtsııalaryn bombalaıtyn avıapolk bolady. Ózderiniń áskerı aerodromnan 300 ret ushyp, jaýǵa bomba jaýdyrǵan eken. Shtýrman bolyp 3 ret qatty jaralanady. Olardyń kishkentaı ushaǵyn nemister «Túngi mystandar» dep ataıtyn, al bul ushaqtan jaýdyń záre-quty qalmaýshy edi.
Maıdandaǵy erligi úshin «Qyzyl Juldyz», 1-shi, 2-shi Dárejeli «Otan soǵysy» ordenderimen nagradtalyp, beıbit ómirde jasaǵan qyzmeti úshin «Eńbek Qyzyl tý» ordenimen, birneshe medaldarmen marapattalǵan.
