Atyraýda halyqty emhanaǵa tirkeý naýqany júrip jatyr
ATYRAÝ. QazAqparat - Naýqan 15 qyrkúıekten 15 qarashaǵa deıin jalǵasady, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Bul týraly búgin ÓKQ ótken baspasóz jıynynda Atyraý oblystyq densaýlyq saqtaý basqarmasy men «ÁMSQ» KEAQ Atyraý oblysy boıynsha fılıalynyń basshylary baıandady.
2018 jyldyń 15 qyrkúıeginde «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń Atyraý oblysy boıynsha fılıaly jyl saıynǵy halyqty emhanaǵa tirkeý naýqanyn bastady.
«Oblys boıynsha 624 myń adam emhanalarda tirkeýde tur. Ótken jylǵy tirkeý nátıjesinde 1725 adam ishki tirkeýge tursa, basqa óńirlerden kelgen 579 adam emhanalar esebine alyndy. Qazirgi tańda halyqqa barynsha qolaıly jaǵdaı jasalǵan. Ár azamat óz erki boıynsha emhana tańdaý quqyǵyna ıe. Atalǵan tirkeý naýqanynda emhanada tirkelmegen turǵyndar tirkeýge turyp, jumys orny, turǵylyqty jeri nemese oqý ornyn aýystyrǵan azamattar emhana aýystyra alady. Turǵylyqty meken-jaıyna jaqyn ornalasqan emhanaǵa tirkelý turǵyndar úshin de, dárigerler úshin de qolaıly bolady. Turǵyndardan naýqanǵa belsendi qatysýyn suraımyz»,- deıdi fılıal dırektory Baıtolla Ǵazızov.
Sonymen qatar, qazirgi tańda oblysta qosymsha ýchaskelik emhanalar sany artqan. Oblystyq densaýlyq saqtaý basqarmasynyń basshysy Mánshúk Aımurzıevanyń aıtýynsha, jańa ýchaskelerdiń ashylýy óte tıimdi.
«Zań boıynsha bir praktık dáriger esebinde turatyn halyq sany 1700-den aspaýy kerek. Ótken jyly oblys boıynsha bir dárigerge 2560 adamnan kelse, búginge deıin jańa bólimsheler ashylyp, tirkelgen adam sanyn 2200-ge túsirdik. Qazirgi tańda jyl sońyna deıin taǵy 35 dárigerlik bólimshe ashýdy josparlap otyrmyz. Nátıjesinde 1 dárigerge 1850 adamnan tirkeletin bolady»,- deıdi basqarma basshysy.
Emhanaǵa tirkeýdiń úsh túrli joly bar:
- tańdap alǵan emhanaǵa tikeleı barý,
- elektrondy úkimet portaly arqyly onlaın rejıminde,
- Halyqqa qyzmet kórsetý ortalyqtaryndaǵy Connection point bólimi arqyly.
Emhanaǵa tirkelý úshin turǵyndar jeke tólqujatyn aparyp, emhananyń bas dárigeriniń atyna ótinish jazady. Al, ózi tańdaǵan emhanaǵa aýysqysy keletinder úshin jeke kýálik jetkilikti. Basqa qalalardan nemese memleketten kelgender úshin burynǵy tirkeý ornynan anyqtama talap etiledi.
