Atyraýda halyqaralyq shahmat festıvali ótedi, júlde qory - 13 mln teńge
Halyqaralyq shahmat festıvalin Atyraý qalasynda 15-24 tamyz aralyǵynda ótkizý josparlanyp otyr. Ony shahmattan álem chempıonatynyń jeńimpazy Dınara Sádýaqasova negizin qalaǵan shahmat akademııasy uıymdastyrady.
«Bizdiń festıvaldiń maqsaty – Qazaqstanda shahmattyń sport túri retinde jan-jaqty damýyna úles qosý. Týrnır túrli elder men jas ókilderiniń basyn qosatyn eleýli oqıǵa bolady dep úmittenemiz. Shara aıasynda árbir shahmat jankúıeri óziniń kúshin «shaıqas alańynda» tájirıbe júzinde synap kóre alady. Festıvaldiń barlyq qatysýshylaryna tek sáttilik pen jeńis tileımin!» -deıdi festıvaldiń uıymdastyrýshysy, birneshe dúrkin álem chempıony, 2019 jyly áıelder arasyndaǵy klassıkalyq shahmattan Azııa chempıony atanǵan tuńǵysh qazaqstandyq Dınara Sádýaqasova.
Onyń aıtýynsha, festıvalǵa 300-ge jýyq shahmat jankúıeri qatysady. Qazir 260 qatysýshy tirkelgen. Onyń ishinde Qazaqstannan ózge 9 eldiń – AQSh, Nıderlandy, Lıtva, Ýkraına, Tájikstan, Ózbekstan, Belarýs pen Reseıdiń tanymal halyqaralyq grossmeısterleri men halyqaralyq sheberleri bar.
Festıvaldiń resmı ashylý saltanaty 16 tamyzda ótedi. Baǵdarlamada Atyrau Open, Atyrau Juniors jáne Atyrau Blitz dep atalatyn úsh negizgi týrnırdi ótkizý josparlanǵan. Onyń árqaısysynyń nátıjeleri shveıtsarııalyq júıe boıynsha baǵalanady. Sondaı-aq, sheberlik sabaǵy men oıyn seansy bir mezgilde ótkiziledi. Festıval aıasynda tóreshiler emtıhan tapsyryp, FIDE tóreshisi ataǵyn ala alatyn halyqaralyq arbıtrlerdiń alǵashqy semınaryn ótkizý kózdelgen.
Qazaqstan-Brıtan tehnıkalyq ýnıversıtetinen bakalavrıat pen magıstratýraǵa arnaıy granttar bólinedi. Grant ıegerleriniń esimderi týrnırdiń jabylý rásiminde jarııalanady.
Eske sala ketelik, budan buryn Atyraýda Tartyl Fest týrnıri márege jetip, rekord jańarmaǵanyn jazǵan edik.
