Atyraýda halyqaralyq kórmeden urlanǵan zattar tárkilenýde
ATYRAÝ. 16 aqpan. QazAqparat - Atyraýda halyqaralyq kórmeni tonap ketken azamattar anyqtaldy.
Oblystyq ІІD-niń baspasóz hatshysy Gúlnázıra Muhtarovanyń aıtýy boıynsha, jedel tergeý toby urlanǵan zattar tyǵylǵan páterge kelip úlgergen. Qazir olar dálelder jınaýmen aınalysýda.
Esterińizge sala keteıik, búgin túnde Atyraýdaǵy halyqaralyq kórmede iri kólemdegi urlyq jasaldy. Urlanǵan zattardyń aldyn ala somasy - 450 myń dollardan az emes, shyndyǵynda ol áldeqaıda kóp bolýy múmkin.
Halyqaralyq saýda kórmesine Reseı, Ispanııa, Úndistan, Belarýs, Ýkraına, Túrkııa, Qyrǵyzstan elderiniń kompanııalary qatysýda. Ol «Munaıshy» sport kesheninde ótip jatyr.
Qala prokýrory Halıdolla Dáýeshevtiń aıtýynsha, urylar keshenge tereze arqyly kirip, zergerlik buıymdar, asyl jáne jartylaı asyl tastar, qymbat kıim, parfıýmerııa sııaqty baǵaly buıymdardy urlaǵan.
