Atyraýda halyq sanaǵy ótedi
ATYRAÝ. QazAqparat - Atyraýda oblys ortalyǵy turǵyndarynyń sanaǵy ótetin boldy. Ol 1 sáýirden bastalady, dep habarlady «QazAqparat» HAA tilshisi.
«Halyq sanaǵyn ótkizý sheshimi densaýlyq saqtaý júıesine mindetti medıtsınalyq saqtandyrýdy engizýge baılanysty. Biz kóp páterdi jáne jekemenshik úılerde turatyn otbasy músheleriniń sanyn ǵana emes, sonymen birge bir adamǵa shaqqandaǵy olardyń tabys deńgeıin aıqyndaımyz. Bul jumyssyzdardyń jáne áleýmettik álsiz otbasylardyń sanyn anyqtaýǵa múmkindik beredi. Kúnkóris deńgeıi tómen otbasylar áleýmettik kómekke júginse, jumyssyzdardy jumysqa ornalastyrýǵa tyrysamyz», - dedi Jumyspen qamtý ortalyǵynyń basshysy Gúlnár Quspanova.
Sanaq júrgizetin jedel topqa ýchaskelik polıtseıler, medbıkeler, jumyspen qamtý ortalyǵynyń mamandary, bilim berý bóliminiń qyzmetkerleri, ákimdik bólimderiniń mamandary kiredi.
Sanaq júrgizýdiń eldegi jappaı tirkelý, páter jaldaýshylar turatyn, salyq tólemeıtin páterler men úıdi anyqtaýmen baılanysy joq.
