Atyraýda Germanııadan ákelingen 9 metrlik shyrsha ornatyldy

ATYRAÝ. QazAqparat – Atyraý qalasynda demeýshiler kómegimen Mahambet atyndaǵy akademııalyq qazaq drama teatrynyń aldyndaǵy alańda bıiktigi 9 metrlik shyrsha ornatyldy, dep habarlaıdy QazAqparat.

Atyraý qalalyq ákimdigi baspasóz qyzmetiniń málimetinshe, shyrshany ornatýǵa bıýdjetten qarjy bólinbegen. Demeýshiler qalaǵa syıǵa tartqan shyrshany Germanııadan ákelgen.

«Ákimdik tarapynan shyrshany ornatý úshin aldyn ala oryn daıyndaldy. Kólemi 4h4, tereńdigi 1,5 metr bolatyn shuńqyr qazyldy. Shyrsha ornatylatyn oryn vermıkompostpen jáne basqa da qajetti organıkalyq mıneraldy tyńaıtqyshtarmen óńdeldi. Shyrshany shuńqyrǵa ornatý úshin shamamen 0,5 metr drenaj qabatyna qum, qıyrshyqtas, ózge de qospa salyndy» dep habarlady qalalyq ákimdiktiń baspasóz qyzmeti.

Sondaı-aq, «Isataı-Mahambet» ortalyq alańyna bıiktigi 15 metrlik jasandy shyrsha, al eki shaǵyn aýdanǵa buryn satyp alynǵan shyrshalardy ornatý kózdelip otyr.