Atyraýda Gazel men avtobýs soqtyǵysyp, jolaýshylary aýrýhanaǵa jetkizildi
ATYRAÝ. QazAqparat – Atyraýda jol apatyna ushyraǵan «Gazel» júrgizýshisi men avtobýs jolaýshylary aýrýhanaǵa tústi. Atyraý qalalyq polıtsııa basqarmasynan málim etkendeı, jol-kólik oqıǵasy 29 mamyrda, saǵat 19:00 shamasynda bolǵan, dep habarlaıdy QazAqparat tilshisi.
«Jol apaty munaıly shaharǵa taıaý ornalasqan Tasqala-3 eldi mekenindegi 18-shi jáne 21-kósheniń qıylysynda bolǵan. Jolaýshy tasymaldaıtyn «Daewoo» markaly avtobýstyń júrgizýshisi oń jaqta kele jatqan «Gazel» kóligine jol bermegen. Osylaısha, avtobýs júrgizýshisi jol-kólik oqıǵasyna sebepker boldy. «Gazel» kóligi soqqy ekpinimen aýdarylyp, kóshe jaryǵynyń baǵanyna soǵyldy», - dep habarlady Atyraý qalalyq polıtsııa basqarmasynan.
Jol-kólik oqıǵasynyń saldarynan birneshe adam ártúrli dene jaraqatymen aýrýhanaǵa jetkizildi. Onyń ishinde «Gazel» kóliginiń júrgizýshisi men qoǵamdyq kóliktiń birneshe jolaýshysy bar.
Polıtsııa qyzmetkerleri tergeýdi bastady.
«Atyraý oblysynda jol-kólik oqıǵalarynyń negizgi sebepteri anyqtalyp otyr. Bul – eldi mekende qozǵalys jyldamdyǵyn arttyrý, qarsy baǵytqa shyǵý jáne basty jolaqtaǵy kólikke jol bermeý», - dep málim etti oblystyq polıtsııa departamentiniń baspasóz qyzmetinen.
Eske sala ketelik, buǵan deıin Atyraý oblysynda jol apatynan júrgizýshi men eki jolaýshy mert bolǵanyn habarlaǵan edik.
