Atyraýda esirtkige elitken júrgizýshi áıeldiń sómkesinen psıhotropty dáriler tabyldy
Oblystyq polıtsııa departamenti baspasóz qyzmetiniń aqparatyna qaraǵanda, patrýldik polıtsııa qyzmetkerleri búgin, 30 qarashada saǵat 4:50 shamasynda «VAZ-2114» kóligin toqtatqan.
«Atyraý qalasyndaǵy «Munaıshy» shaǵyn aýdanynda «VAZ-2114» avtokóligin tekserý kezinde júrgizýshiniń esirtkilik mas kúıde ekeni anyqtaldy. Kóliktiń rýlinde Ózbekstan Respýblıkasynyń 1992 jylǵy azamatshasy bolǵan. Júrgizýshi medıtsınalyq saraptamadan ótkizildi. Saraptama qorytyndysymen sheteldik júrgizýshi áıeldiń esirtkilik mas kúıde bolǵany dáleldendi. Atalǵan azamatshaǵa qatysty QR Ákimshilik quqyqbuzýshylyq týraly kodeksiniń 608-babymen ákimshilik hattama toltyrylyp, is-qujattar ákimshilik sotqa joldandy. Tekserý kezinde áıeldiń qol sómkesinen ár túrli 34 dana psıhotroptyq dári-dármek tabyldy», - dep habarlady departamenttiń baspasóz qyzmeti.
Qazir kólikti esirtkige elitken kúıde júrgizgen áıelge qatysty №2 Atyraý qalalyq polıtsııa bóliminiń jedel tergeý toby tergep-tekserý amaldaryn júrgizip jatyr.
Eske sala ketelik, budan buryn Atyraýda psıhotropty dári-dármek satqan erli-zaıypty ustalǵanyn habarlaǵan bolatynbyz. Páterde áseri qatty dári-dármek satýmen aınalysqan 1982 jylǵy áıel men 1987 jylǵy er adam ustalǵan. Erli-zaıyptynyń páterinen tek dáriger belgilegen retseptimen ǵana beriletin 171 tramadol, 97 tropıkamıd dári-dármegi tárkilengen. Kúdikti áıel adam buryn da dál osyndaı quqyqbuzýshylyq áreketi úshin jaýapkershilikke tartylǵan.