Atyraýda esirtkige elitip, rýlge otyrǵan jigit júrgizýshi kýáliginen aıyryldy
ATYRAÝ. QazAqparat – Atyraýda esirtki tutynyp, rýlge otyrǵan jigit kólik júrgizý quqyǵynan aıyryldy, dep habarlaıdy QazAqparat.
Oblystyq polıtsııa departamentiniń baspasóz qyzmetinen málim etkendeı, esirtki shekken júrgizýshi 18 aqpanda ustalǵan.
«Patrýldik polıtsııa qyzmetkerleri túngi saǵat 01:48 shamasynda Atyraý qalasyndaǵy Azattyq-Temirhanov kósheleriniń «Toyota Windom» avtokóligin toqtatyp, tekserý júrgizgen. Kúdik týdyrǵan 34 jastaǵy júrgizýshi Atyraý qalalyq medıtsınalyq saraptamaǵa jetkizildi. Saraptama qorytyndysyna sáıkes júrgizýshiniń «Kannabınoıd» esirtkisin tutynyp, masań kúıde ekeni anyqtaldy. Júrgizýshige qatysty QR Ákimshilik quqyqbuzýshylyq týraly kodeksiniń 608-babynyń 1-bóligimen hattama toltyrylyp, sotqa joldandy», -dep málim etti departamenttiń baspasóz qyzmetinen.
Sot sheshimimen esirtkige elitken júrgizýshi 15 táýlikke ákimshilik qamaýǵa alyndy. Sondaı-aq, ol 7 jyl merzimge kólik júrgizý quqyǵynan aıyryldy.
Eske sala ketelik, buǵan deıin Atyraýda mas kúıde rýlge otyrǵan sheteldik 7 jylǵa kólik júrgizý quqyǵynan aıyrylǵan edi.
