Atyraýda erli-zaıypty alaıaqtar 150 mln teńgeni qaltaǵa basqan

ATYRAÝ. QazAqparat – Atyraýda 150 mln teńgeni alaıaqtyqpen ıemdengen erli-zaıyptylar sottaldy, dep habarlaıdy QazAqparat.

Oblystyq polıtsııa departamentiniń baspasóz qyzmetinen málim etkendeı, erli-zaıyptylar 18 adamdy aldaǵan.

«Atyraý qalasynda 1983 jylǵy áıel óziniń tanystaryna kúıeýiniń kompanııasyna úlesker bolý úshin qarajat quıyp, keıin túsken tabystan paıda tabatynyna sendirgen. Alaıda, jıǵan-tergen qarjysyn úleskerlikke salǵan 18 turǵyn eshqandaı paıda kórmegen, ne qaıtara almaǵan. Sodan soń polıtsııaǵa aryz jazǵan. Osy derekke baılanysty departament qyzmetkerleri QR Qylmystyq kodeksiniń 190-babynyń 4-bóligi, 2-tarmaqshasymen tergeý júrgizdi. Tergeý kezinde asa iri kólemdegi alaıaqtyq kúdigine ilingen erli-zaıyptylardyń 18 jábirlenýshige 150 mln teńge zalal keltirgeni anyqtaldy. Mundaı alaıaqtyq deregi turǵyndardyń qarajatyn eselep beremin degen adamdardyń arbaýyna túsýi saldarynan tirkelip otyr» - deıdi Atyraý oblystyq polıtsııa departamentiniń bastyǵy, polıtsııa polkovnıgi Qamza Úmbetqalıev.

Erli-zaıypty alaıaqtardyń isi 16 qarashada Atyraý qalasyndaǵy №2 sotta qaraldy. Sot úkimimen jábirlenýshilerdiń 150 mln teńgesin alaıaqtyq jolmen ıemdengen erli-zaıyptylar 5 jylǵa bas bostandyǵynan aıyryldy.

Eske sala ketelik, buǵan deıin Atyraý oblysynda jalaqysy joǵary jumysqa ornlastyramyn dep 14 adamdy aldaǵan alaıaq qamalǵanyn jazǵan bolatynbyz.