Atyraýda eriktiler ulttyq naqyshta medıtsınalyq maska tigýdi bastady

ATYRAÝ. QazAqparat –Atyraýda eriktiler turmysy tómen otbasylar úshin ulttyq oıýmen bezendirilgen medıtsınalyq maska tigýdi bastady, dep habarlaıdy QazAqparat.

Bul ıdeıany iske asyrýshy – «Assyl collection» atelesiniń negizin qalaýshy, sándi kıimder dızaıneri Asyl Dúzbaeva.

«Dárihanalardaǵy maska tapshylyǵy týraly estip, ony ózimiz tiksek degen oıǵa bekindik. Biz barlyq eriktilerdi osyndaı iske atsalysýǵa shaqyryp, chellendj bastadyq. Keshke deıin barlyq tapsyrysty toqtatyp qoıyp, kem degende 40 maska tigýdi kózdedik. Bul –birneshe qabaty bar, kóp ret qoldanylatyn maska. Ony jýyp, qaıta qoldana berýge bolady. Sondyqtan, ádemi kórinýi úshin maskany ulttyq oıýmen bezendirýdemiz» -dedi Asyl Dúzbaeva.

Ol daıyn maskany kópbalaly otbasylarǵa tegin taratýdy josparlap otyr. Al, ony satyp alamyn deýshilerge qarsylyq bildirmeıdi. Saýdadan túsken kiristi qaıyrymdylyq sharasyna jumsamaq. Kómekti qajet etetinderdiń tizimin oblystyq jumyspen qamtýdy úılestirý jáne áleýmettik baǵdarlamalar basqarmasynan, ártúrli qorlardan alady.

«Árkim bul indetke qarsy kúresti ózinen bastaýy kerek. Azamattyq ortalyqtyń kómegimen maska tigý isine Atyraý qalasyndaǵy eriktilerdi, «Іsker ana» jobasyna qatysýshylardy tartyp otyrmyz»-dedi Asyl Dúzbaeva.

Al, «Іsker ana» jobasyna qatysyp, tigin isine mashyqtanǵan Áıgerim Beksultanova koronavırýs indetiniń aldyn alý úshin aktsııaǵa atsalysýdy paryzy sanaıdy.

«Juqpaly indettiń zardaby aýyr ekenin bilip otyrmyz. Odan qorǵanýǵa sep bolar joba týraly estip, odan shet qala almadym. Bul –qoǵam úshin paıdaly is. Sol sebepten, men de óz úlesimdi qosqym keldi» -dedi ol.