Atyraýda erejesiz jekpe-jekten halyqaralyq týrnır ótti
Atyraý qalasyndaǵy «Jaıyq» sport kesheninde ótken erejesiz jekpe-jekten «Eagle FC 51» halyqaralyq kásipqoı týrnırine Qazaqstan, Qyrǵyzstan, Tájikstan, Ózbekstan jáne Reseı sportshylary qatysty. Týrnırde jalpy sany 15, onyń ishinde úsh tıtýldyq jekpe-jek ótti.
Máselen, reseılik sportshylar Renat Havalov pen Renat Ondar tıtýldyq kezdesýde 5 raýndqa deıin teń tústi. Sońǵy raýndta R. Havalov óziniń chempıondyq belbeýin sátti qorǵap qaldy.
«Eagle FC 51» arnaıy chempıondyq beldigi úshin basty jekpe-jek reseılik sportshylar Denıs Izmodenov pen Imam Shafı Mýhtarov arasynda órbidi. Tartysty aıqas nátıjesinde D.Izmodenov qarsylasyn 5-raýndta jeńip, «Eagle FC 51» tujyrymdamasynyń orta salmaqtaǵy chempıony atandy.
«Týrnırdi uıymdastyrýǵa atsalysqan oblys ákimine, Atyraý jurtshylyǵyna aıtar alǵysym sheksiz. Adamnyń ómirinde birinshiden, tárbıe, ekinshiden, bilim, úshinshiden sporttyq baby bolýy kerek. Eger osy úsheýiniń basyn biriktire alatyn býyn tárbıelesek, bizdiń jolymyzdyń bolǵany», - dedi UFC chempıony Habıb Nýrmagomedov.
«Eagle FC 51» halyqaralyq týrnırinde Atyraý oblysynan úsh sportshy qatysty. Onyń biri Farhat Qojantaev birinshi raýndta tehnıkalyq nokaýtpen, Ádilbek Qaıyrǵalı ekinshi raýndta gılotına ádisimen, al Nurbek Otar ekinshi raýndta tehnıkalyq raýndpen jeńiske jetti.
Eske sala ketelik, budan buryn UFC chempıony Habıb Nýrmagomedov atyraýlyq jankúıerlerimen kezdeskenin jazǵan edik.