Atyraýda erekshe balalardy uryp-soqqan ońaltý ortalyǵynyń mamany 4 jylǵa sottaldy
Atyraý qalasy № 2 sotynyń baspasóz qyzmetinen málim etkendeı, sotta balalardy ońaltý ortalyǵynyń mamanyna qatysty qylmystyq is qaralǵan.
Kúdiktige QR Qylmystyq kodeksiniń 110-baby 2-bóliginiń 1,2-tarmaqtarymen aıyp taǵylǵan.
«Balalardy ońaltý ortalyǵynyń mamany K-nyń mindetine 45 mınýtta erekshe balalardy daǵdylarǵa úıretý, minez-qulyǵyn ońaltý kirgen. Ol balalar ortalyǵynyń arnaıy kabınetinde kámeletke tolmaǵandarmen jeke sabaq ótkizý kezinde kámeletke tolmaǵan K, B, A-ǵa udaıy uryp-soǵý nemese kúsh qoldaný áreketi arqyly tán zardabyn nemese psıhıkalyq zııan keltirgen. Sottalýshy K-nyń kinási jábirlenýshilerdiń zańdy ókilderiniń, kýágerlerdiń aıǵaqtarymen, saraptama qorytyndysymen, beınejazbalarmen, is boıynsha basqa da dáleldemelermen tolyq dáleldendi», -dep habarlady №2 sottyń baspasóz qyzmeti.
Prokýror K.-ǵa 4 jylǵa merzimge bas bostandyǵynan aıyrý jazasyn taǵaıyndaýdy usynǵan.
Kámeletke tolmaǵan jábirlenýshilerdiń zańdy ókilderi sottalýshydan moraldyq zalal óndirip alýdy suraǵan.
«Sottalýshy kinásin ishinara moıyndady. Onyń advokaty K-nyń áreketin QR Qylmystyq kodeksiniń 140-babynyń 2-bóligine (kámeletke tolmaǵan adamdy tárbıeleý jónindegi mindetterdi oryndamaý) qaıta dárejeleýdi surady. Jaza taǵaıyndaý kezinde K-nyń buryn sotty bolmaǵany, asyraýynda jas balasynyń bary eskerildi. Sot K-ny QR Qylmystyq kodeksiniń 110-baby 2-bóliginiń 1,2-tarmaqtarymen kináli dep tanydy. Oǵan 4 jyl merzimge bas bostandyǵynan aıyrý jazasy taǵaıyndaldy», -dep málim etti sottyń baspasóz qyzmetinen.
Sottalýshydan jábirlenýshilerdiń paıdasyna 6 mln teńge kóleminde moraldyq zııan ótemaqysy óndirildi.
Sot úkimi zańdy kúshine engen joq.
Eske sala ketelik, buǵan deıin Atyraýda arnaıy balabaqshada erekshe balany qorlaý deregine baılanysty tergeý bastalǵanyn jazǵan edik.
