Atyraýda er adamdy atyp óltirdi degen kúdikti ustaldy
ATYRAÝ. QazAqparat - Atyraýda er adamdy atyp óltirdi degen kúdikti ustaldy, dep habarlaıdy QazAqparat tilshisi.
«Baımuqanov kóshesindegi úılerdiń biriniń aldynda 32 jastaǵy er adamdy óltirý deregi boıynsha QR Qylmystyq Kodeksi 99-babynyń 1-bóligimen sotqa deıingi tergep-tekserý bastaldy. Qylmysqa qatysy bar degen kúdikti ustaldy. QR QPK 201-baby 1-bóligine sáıkes, basqa aqparat berilmeıdi», - dep málimdedi Atyraý oblystyq polıtsııa departamentiniń baspasóz qyzmeti.
Eske sala keteıik, Atyraýda polıtsııa adamǵa oq atqan Maqat aýdanynyń eki turǵynyn izdep jatqany týraly habarlaǵan edik. Áleýmettik jelide taralǵan habarlamaǵa qaraǵanda, oblystyq aýrýhananyń jansaqtaý bólimine 1986 jylǵy er adam túsken. Onyń sol ıyǵyna bireý bytyramen oq atyp, jaraqattaǵan.
Oblystyq polıtsııa departamenti baspasóz qyzmetiniń málimdeýinshe, atys kezinde jaralanǵan Maqat aýdanynyń turǵyny, 1986 jyly týǵan er adam qaıtys bolǵan.
