Atyraýda eń úzdik kásipker áıelder tańdaldy
ATYRAÝ. QazAqparat - Atyraýda «Business Lady Qazaqstan» jobasynyń irikteý kezeńi ótti. Atalǵan joba Qazaqstanda alǵash ret uıymdastyrylýda, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Baıqaýdyń aımaqtaǵy irikteý kezeńine 7 kásipker áıel qatysty. Olardyń qatarynda restorator, sulýlyq salonynyń basshysy, dıetolog, balalar shyǵarmashylyǵy men ońaltý ortalyǵynyń, fıtnes ortalyǵynyń názik jandy basshylary bar. Qatysýshylar 3 kezeń, atap aıtqanda, tanystyrý, suraq-jaýap jáne shyǵarmashylyq kezeńderi boıynsha synǵa tústi.
«Bul respýblıkalyq baıqaý elimizde alǵash ret uıymdastyrylýda. Baıqaýdyń maqsaty ár óńirdegi bedeldi, birqatar jumys ornyn quryp, salyq tólep otyrǵan isker áıelderdi nasıhattaý. Olar óz-ózderin iri baıqaýlarda kórsetip, halyq yqylasyna bólenýge laıyqty dep esepteımin. Baıqaýdy bolashaqta jyl saıyn dástúrli túrde ótkizý josparda bar», - deıdi joba jetekshisi Sáýle Qaısar.
Jarys qorytyndysy boıynsha, irikteý kezeńinde bas júldeni «Sáýlem-aı» ıntellektýaldyq jan-jaqty damytý ortalyǵynyń dırektory Sáýle Ernııazova jeńip aldy. Endi Sáýle jyl sońynda Astana qalasynda ótetin fınalda Atyraý oblysynyń namysyn qorǵaıdy. Baıqaýdyń basty júldeleriniń biri Londonǵa joldama. Sonymen qatar, demeýshiler kómegimen fınaldyq kezeńniń júlde qory áli de tolyǵýda.
Aıta ketý kerek, qazirgi tańda oblysta 23 000 áıel kásipker tirkelgen. Olar túrli bıznes túrimen aınalysyp, birqatar jumys oryndaryn ashýǵa sebep boldy.
