Atyraýda emhanalar josparly emdeýdi bastady
ATYRAÝ. QazAqparat –Atyraý oblysynda emhanalar josparly emdeýdi bastady. Bul týraly oblystyq densaýlyq saqtaý basqarmasynyń baspasóz qyzmeti habarlady, dep habarlaıdy QazAqparat.
Josparly emdeýdi bastaǵan emhananyń qatarynda №1 Atyraý qalalyq emhanasy da bar. Emhananyń bas dárigeri Ásııa Narymbaevanyń aıtýynsha, josparly emdeýge jatatyn qan qysymy, gıpertonııa, qant dıabeti, astma syndy aýrýlarǵa shaldyqqan naýqastar aldyn ala ýchaskelik dárigerge kórinedi. Keıin dárigerdiń nusqaýymen analız tapsyrady.
«Syrqatynyń kúrdeliligine qaraı naýqas kúndizgi statsıonarda emdele alady. Olarǵa tegin dári-dármek beriledi. Sondaı-aq, aýrýhanalarǵa jatyp emdelý de qarastyrylǵan. Bul úshin naýqasty ýchaskelik dáriger portalǵa engizip qoıady. Portaldy kútý kezeńi bir apta kóleminde bolýy múmkin. Bul aýrýhanadaǵy naýqastar sanyna baılanysty belgili bolady», - deıdi Ásııa Narymbaeva.
Onyń aıtýynsha, josparly em qabyldaıtyn naýqas mindetti túrde koronavırýs ınfektsııasyna analız tapsyrady. Analız qorytyndysynyń jaramdylyq merzimi 5 kúnge ǵana sozylady. №1 Atyraý qalalyq emhanasynyń kúndizgi statsıonar bólimshesinde 12 oryn bar. Sondaı-aq, 20 oryndyq provızorlyq statsıonar ashylǵan.
Eske sala ketelik, budan buryn Atyraýda aýrýhanalar tamyzda josparly emdeýdi bastaıtynyn habarlap edik.
