Atyraýda emhanaǵa kelýshilerdiń qyzýyn robot tekseredi
ATYRAÝ. QazAqparat – Atyraý №4 qalalyq emhanaǵy kelýshilerdiń qyzýyn robot tekseredi, dep habarlaıdy QazAqparat tilshisi.
Oblystyq Densaýlyq saqtaý basqarmasynyń aqparatyna qaraǵanda, budan bylaı emhanaǵa kelýshilerdi medıtsına qyzmetkeri emes, robot qurylǵysy qarsy alady. Ol kelýshilerdiń dene qyzýyn tekseredi. Medıtsınalyq maskany durys taqpaǵan adamǵa eskertý jasaıdy.
«Dene qyzýyn ólsheıtin robot qurylǵy elimiz boıynsha alǵash ret pılottyq júıe retinde Atyraý oblysynda iske qosylyp otyr. Buryn álemdik tájirıbede synalǵan robot qurylǵynyń tıimdi tustary kóp. Medıtsına qyzmetkeri ýaqytyn únemdeıdi ári naýqastarmen baılanys jasaǵan kezde ara-qashyqtyqty saqtaıdy. Emhana qyzmetkeri endi robot kórsetken monıtordy ǵana baqylap otyrady. Óıtkeni, «aqyldy» tehnıka ǵımaratqa dene qyzýymen kelgen naýqasty birden anyqtaıdy. Monıtor betine sol adamnyń sýretin kórsetip, qyzyl túspen ereksheleıdi. Al maskasyz nemese ony durys taqpaǵan kúıi ishke ense, onyń sýretin sary túske boıap, dabyl qaǵady. Daýystap eskertý jasaıdy», - deıdi Atyraý qalalyq №4 emhanasynyń bas dárigeri Merýert Óteǵalıeva.
