Atyraýda emhanaǵa kelýshilerdiń dene qyzýyn robot ólsheıdi
NUR-SULTAN. QazAqparat - Atyraý qalalyq №4 emhanasyna kelýshilerdi endi medıtsına qyzmetkeri emes, robot qurylǵy qarsy alyp, dene qyzýyn ólsheıdi. Maskasyn durys taqpaǵan adamǵa da eskertý jasaıdy, dep habarlaıdy Atyraý oblystyq densaýlyq saqtaý basqarmasynyń baspasóz qyzmeti.
«Dene qyzýyn ólsheıtin robot qurylǵy elimiz boıynsha alǵash ret pılottyq júıe retinde Atyraý oblysynda iske qosylyp otyr. Buryndary álemdik tájirıbede synalǵan robot qurylǵynyń tıimdi tustary kóp. Medıtsına qyzmetkeri ýaqytyn únemdeıdi ári naýqastarmen baılanys jasaǵan kezde araqashyqtyqty saqtaıdy. Emhana qyzmetkeri endi robot kórsetken monıtordy ǵana baqylap otyrady. Óıtkeni, «aqyldy« tehnıka ǵımaratqa dene qyzýymen kelgen naýqasty birden anyqtaıdy. Monıtor betine sol kisiniń sýretin kórsetip qyzyl túspen ereksheleıdi. Al betperdesiz nemese durys taqpaǵan kúıi ishke ense onyń sýretin sary túske boıap, dabyl qaǵady. Daýystap eskertý jasaıdy», - deıdi Atyraý qalalyq №4 emhanasynyń bas dárigeri Merýert Óteǵalıeva.
«SIK vıjn» men «Bılaın» kompanııasy birlesip jasaǵan dene qyzýyn ólsheıtin robot qurylǵyny aldaǵy ýaqytta oblystyń ózge de emdeý mekemelerine de ornatý josparlanǵan.
