Atyraýda elektrondy temeki tartqan oqýshylardyń ata-analaryna aıyppul salyndy
Atyraýda birneshe kún buryn áleýmettik jeli men WhatsApp messendjeri arqyly elektrondy temeki tartqan jasóspirimderdiń beınejazbasy taraǵan bolatyn. Bul turǵyndar arasynda túrli qoǵamdyq pikir týǵyzdy.
Keıin elektrondy temeki tartyp, tútinin býdaqtatqan oqýshylar anyqtaldy. Olar – Atyraý qalasyndaǵy J. Qarajigitov atyndaǵy №16 mektep-lıtseıdiń oqýshylary.
«Osyǵan baılanysty oblystyq bilim basqarmasynyń ókilderi, ýchaskelik jáne ıývenaldy polıtsııa ınspektorlary atalǵan bilim ordasynda oqýshylarmen kezdesý ótkizdi. Oqýshylar men olardyń zańdy ókilderiniń (ata-analarynyń) qatysýymen profılaktıkalyq jumystar júrgizildi. Vıdeoda temeki tartqan oqýshylardyń ata-analary ákimshilik jaýapkershilikke tartyldy. Ata-analarǵa qatysty QR Ákimshilik quqyqbuzýshylyq týraly kodeksi 441-babynyń 1-bóligimen hattama jasaqtalyp, 45 945 teńge kóleminde aıyppul salyndy», - dep habarlady oblystyq bilim basqarmasynyń baspasóz qyzmeti.
Jasóspirimderdiń mektepten tys minez-qulqynyń aldyn alý jáne baqylaýdy kúsheıtý maqsatynda keshendi is-sharalar qabyldanyp otyr. Onyń ishinde kezekten tys ata-analar jınalysyn ótkizý bar.
«Muǵalimder men ata-analardyń kezdesýinde oqýshylar tarapynan quqyq buzýshylyqtardyń aldyn alý, ata-analardyń balalaryn tárbıeleýdegi jaýapkershiligi týraly máseleler kóteriledi. Mektepterge jaqyn ornalasqan dúkenderde monıtorıng júrgizetin komıssııalar óz jumysyn bastady. Monıtorıng kezinde komıssııa músheleri dúken ıelerine 21 jasqa tolmaǵan jasóspirimderge temeki ónimderin satýǵa jol bermeý týraly túsindiredi. Bul birlesken monıtorıngini bilim basqarmasy, óńirlik kásipkerler palatasy men jergilikti polıtsııa qyzmetiniń ýchaskelik ınspektorlary júrgizedi», - dep málim etti basqarmanyń baspasóz qyzmetinen.
Eske sala ketelik, buǵan deıin Atyraýda balalar tym kóp jep qoıǵan energetıkalyq qospasy bar untaq tekseriletinin jazǵan edik.
Vıdeodan alynǵan kadr
