Atyraýda elektr energııasynyń óshýinen mektepter onlaın oqýǵa kóshirildi

ATYRAÝ. QazAqparat – Atyraý qalasyndaǵy Geolog, Juldyz, Jumysker shaǵynaýdandarynda jáne shahardyń eski bóliginde ornalasqan balabaqshalar men mektepterde elektr energııasy óship qaldy. Osyǵan baılanysty 10307 oqýshy sabaqty onlaın oqýǵa kóshirildi, dep habarlaıdy QazAqparat tilshisi.

Ótken aptada el Prezıdenti Qasym-Jomart Toqaev Atyraýda jaryq jıi sónip qalatynyn synǵa alǵan edi.

«Atyraý oblysyndaǵy taǵy bir ózekti másele – elektr jelisiniń tozýy. Onyń 40 paıyzǵa jýyǵy eskirgen. Bıyl 15 eldi mekenniń elektr jelisi jóndelip jatyr. Degenmen, bul jetkiliksiz. Sońǵy jyldary aımaqta elektr qýaty júıesi durys istemeıtin boldy. Óńirdegi energııa tapshylyǵy – shamamen 200 megavatt. «Atyraý Jaryq» kompanııasynyń jumysyna qatysty syn-eskertýler bar. Eger kompanııa óz mindettemesin oryndamasa, ondaı kelisimdi buzý qajet», - dedi atyraýlyqtarmen kezdesýde Prezıdent.

Atyraý qalasynda elektr energııasynyń óshýi keshe, 13 qarashada bastalǵan. Al búgin, 14 qarashada 5 balabaqsha men 6 mektepte jaryq áli janbaǵan.

«Osyǵan baılanysty №26 balabaqshadan – 294 bala, №33 balabaqshadan – 187, №35 balabaqshadan – 278, №36 balabaqshadan – 164, Shaǵala balabaqshasynan 139 bala úıine qaıtaryldy.

Al jalpy orta bilim beretin 6 mektepte elektr jaryǵy joq. Sol sebepten, Atyraý qalasyndaǵy №2 J.Nájimedenov atyndaǵy orta mekteptiń – 1874 oqýshysy, №35 mektep-gımnazııanyń – 1564, №36 mektep-gımnazııanyń – 1445, №39 orta mekteptiń – 2332, Q.Smaǵulov atyndaǵy orta mekteptiń – 1429, B.Nysanbaev atyndaǵy orta mekteptiń 1663 oqýshysy onlaın oqýǵa kóshirildi», - dep habarlady oblystyq bilim basqarmasynyń baspasóz qyzmetinen.

Elektr jaryǵy joq balabaqshalar men mektepterdiń qyzmetkerleri jumysyn jalǵastyryp jatyr.

Elektr jaryǵynyń óshýine baılanysty «Atyraý-Jaryq» AQ basshylyǵy túsinik bergen joq.

Foto: sharonselby.com