Atyraýda el aýmaǵyna zańsyz kelgen sheteldik 6 aıǵa sottaldy

ATYRAÝ. QazAqparat – Atyraýda el shekarasynan zańsyz ótip kelgen sheteldik 6 aıǵa sottaldy. Oǵan el aýmaǵyna 5 jylǵa deıin kirýge tyıym salyndy, dep habarlaıdy QazAqparat tilshisi.

Atyraý oblystyq polıtsııa departamentiniń baspasóz qyzmetinen málim etkendeı, «Mıgrant» jedel profılaktıkalyq is-sharasy kezinde sheteldiktiń el aýmaǵyna zańsyz ótkeni anyqtalǵan.

«Qurmanǵazy aýdandyq polıtsııa bólimi qyzmetkerleri bıylǵy 21 sáýirde Ózbekstan Respýblıkasynyń 44 jastaǵy azamaty jeke basyn kýálandyratyn qujatsyz Qazaqstan Respýblıkasynyń memlekettik shekarasynan qasaqana zańsyz ótken belgili boldy. Atyraý oblysynyń Qurmanǵazy aýdany aýmaǵynan ustalǵan 44 jastaǵy sheteldiktiń QR Ákimshilik quqyq buzýshylyq týraly kodeksiniń 517-babynyń 7-bóliginiń (Sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qon salasyndaǵy zańnamasyn buzýy) talabyn buzǵan. Onyń buryn el aýmaǵynan 5 jylǵa tysqary shyǵarylǵany anyqtaldy», - dep habarlady departamenttiń baspasóz qyzmeti.

Ózbekstan Respýblıkasynyń azamatyna qatysty QR Qylmystyq kodeksiniń 392-babymen qylmystyq is qozǵaldy. Qurmanǵazy aýdandyq sotynyń úkimimen Ózbekstan Respýblıkasynyń azamaty kináli dep tanylyp, 6 aı merzimge bas bostandyǵynan aıyryldy. Sheteldikke el aýmaǵyna 5 jyl merzimge kelýge tyıym salyndy.

Eske sala ketelik, buǵan deıin Atyraý oblysynda ýaqytsha turýǵa ruqsat berilgen sheteldikter qatary kóbeıgenin habarlaǵan bolatynbyz.

Oblystyq polıtsııa departamenti baspasóz qyzmetiniń málimetinshe, bıyl jyl basynan beri 17 337 sheteldikke ýaqytsha turýǵa ruqsat berilgen.

Onyń ishinde 2 514 adam alys shetelderden kelgeni anyqtalǵan. Sondaı-aq, TMD elderinen kelgen 14 823 adam tirkelgen.