Atyraýda ekpeden keıin mazasy qashqan qyzdyń qazirgi jaǵdaıy qalaı
ATYRAÝ. QazAqparat - Atyraý oblysynda dárigerler ekpeden keıin mazasy qashqan 16 jastaǵy qyzdyń jaǵdaıyn baqylap otyr, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Qurmanǵazy aýdany ortalyq aýrýhanasynyń dırektory Gúlshara Mýtıeva mán-jaıdy túsindirdi.
«23 qańtar kúni Qurmanǵazy aýdanynyń Aqkól aýylynda ekpe jasaǵannan keıin 16 jastaǵy qyz ózin nashar sezingen. Jergilikti qyzmetkerler aýdannan terapevt shaqyrtqan. Qyz ortalyq aýdandyq aýrýhanaǵa jetkizilgen», - dedi ol.
Aýrýhana dırektorynyń aıtýynsha, qyzǵa jan-jaqty medıtsınalyq kómek kórsetilip, sanıtarııalyq avıatsııamen 24 qańtarda oblystyq balalar aýrýhanasyna jetkizilgen de, sonda kompıýterlik tomografııa jasalǵan. Qyzdyń densaýlyǵynan kóńilge kúdik uıalatatyn eshteńe tabylmady.
«Keıin anyqtalǵandaı, qyzdyń otbasynda besinshi synypta oqıtyn, epılepsııadan zardap shegetin bala bar. Ekpeni qabyldaýyna sol da áser etken bolýy múmkin. Nelikten ekpeden keıin mazasyzdanǵanyn mamandar anyqtaıdy. Múmkin, jaı qoryqqan shyǵar», - deıdi Gúlshara Mýtıeva.
Qurmanǵazy aýdanynda ekpe egý qazan aıynan beri jalǵasyp jatyr. Aýdanǵa 800 doza ákelinip, qazirge deıin 220 jasóspirimge egilgen. Olardyń eshbirinde keri áseri baıqalmaǵan.
Avtory: A. Sokolov
