Atyraýda ekpe almaǵan balalar qyzylshaǵa shaldyqqan
ATYRAÝ. QazAqparat - Atyraý oblysynda ekpe almaǵan balalar qyzylshaǵa shaldyǵyp jatyr. Aýyrǵan balalardyń 85 paıyzy 14 jasqa deıingiler, - dep habarlaıdy QazAqparat óńirlik kommýnıkatsııalar qyzmetine silteme jasap.
Atyraý oblystyq qoǵamdyq densaýlyq saqtaý basqarmasynyń basshysy Temirbek Musaǵalıevtiń aıtýynsha, qazir qyzylshaǵa shaldyqqan balalardyń densaýlyqtary qalypty, kún saıyn medıtsınalyq kútim jasalady.
"Aýyrǵandar arasynda bir jasqa tolmaǵan náresteler bar, olar vaktsınatsııadan ótpegen, medıtsınalyq kórsetkishter boıynsha ekpe almaǵan jáne ekpe saldyrýdan bas tartqan. Sondyqtan ata-analardy balalarynyń densaýlyqtaryna jaýapkershilikpen qarap, vaktsına ınfektsııalyq kontagıozdyq aýrýlardyń aldyn alatynyn eskerte otyryp, ekpeden bas tartpaýǵa shaqyramyz. Vatsınatsııa qory bizde jetkilikti, turǵylyqty meken-jaıy boıynsha kez kelgen emhanaǵa baryp, tegin ekpe saldyrýǵa bolady", - deıdi Temirbek Musaǵalıev.
Aıta keteıik, aımaqta qazir osy jaǵdaı jiti baqylaýda tur. Ótken jyldyń qazan aıynda jumys toby quryldy. Búginge deıin mamandar oblystyń barlyq aýdandaryna baryp, aqparattyq-túsindirme jumystaryn júrgizdi, turǵyndar men medıtsına qyzmetkerlerine saqtyq sharalary jaıynda aıtty, mektepterde, ınternat, balabaqshalarda boldy, sondaı-aq emhanalarda, statsıonarlyq bólimderde arnaıy kabınetterdiń jabdyqtalýyn qadaǵalady. Osyndaı jumystardyń nátıjesinde buryn bas tartyp kelgen 752 bala qyzylshaǵa qarsy ekpe aldy.
Jalpy elimizde qazir qyzylsha aýrýy boıynsha epıdemıologııalyq jaǵdaı qolaısyz bolyp tur. Qyzylsha aýrýynyń 1148 deregi tirkelgen, sonyń ishinde 476 (41,4%) zerthanalyq tekserispen rastaldy. 2018 jyly Atyraý oblysynda qyzylsha aýrýyn juqtyrǵandar tirkelgen joq.
Búkil álemdik densaýlyq saqtaý uıymynyń deregi boıynsha ótken jyly álemdegi 138 elde (aýrý týraly esep beretin 184 eldiń ishinen) 319 myń qyzylsha aýrýy deregi tirkelgen, onyń ishinde DDSU Eýropalyq aımaǵyndaǵy 53 eldiń 47-sinde 70 myńnan astam adam qyzylsha juqtyrǵan.
