Atyraýda eki jasóspirimdi qaqqan júrgizýshi kóligin tastap qashyp ketti
Oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy keshe, 17 tamyzda bolǵan.
«Jergilikti ýaqytpen saǵat 22:40 shamasynda markasy «VAZ-2114» avtokóliginiń júrgizýshisi Atyraý qalasynda eki jasóspirimdi qaǵyp ketkeni belgili boldy. Ol Satpaev kóshesinde ornalasqan «Atyraý» oıyn-saýyq ortalyǵy tusynda rettelmegen jaıaý júrginshiler ótkelinen ótip bara jatqan 2004 jáne 2005 jylǵy jasóspirimderdi kóligimen qaǵyp qulatqan», - dep habarlady departamenttiń baspasóz qyzmetinen.
Alaıda, jol-kólik oqıǵasyna kináli júrgizýshi avtokóligin oqıǵa ornynda qaldyryp, qashyp ketken. Qazir «VAZ-2114» avtokóligi arnaıy turaqqa qoıyldy. Al, kim ekeni áli anyqtalmaǵan júrgizýshi izdestirilip jatyr.
Budan buryn Atyraýda qoǵamdyq kólik jaıaý júrginshini qaǵyp ketken edi. Kóliktiń rólinde 59 jastaǵy júrgizýshi bolǵan. Ol Qurmanǵazy kóshesimen qozǵalyp kele jatyp, jol qaýipsizdigin qadaǵalamaǵan.
Al, esirtki shegip, kólik júrgizgen jigit polıtsııadan qashpaq boldy. Polıtseıler kólik rólinde Atyraý qalasynyń 33 jastaǵy turǵyny bolǵanyn anyqtady. Júrgizýshiniń kólik quralyn júrgizý quqyǵy bolmaǵan. Onyń esirtkilik zat qabyldap, kólik júrgizgeni belgili boldy. Sony jasyrý úshin júrgizýshi polıtseılerden qashqanmen, alysqa uzamaı ustaldy.
