Atyraýda eki kúnnen beri ıisi sezilip turǵan tútinniń oshaǵy anyqtalmaı jatyr
Atyraý turǵyndary áleýmettik jelide tútinniń ıisi týraly jarysa jazyp jatyr. Turǵyndardyń pikirinshe, tútinniń ıisi 29 qańtarda sezilgen.
Alaıda, oblystyq tótenshe jaǵdaılar departamentiniń baılanys tobynan málim etkendeı, Kaspıı jaǵalaýy men «Aqjaıyq» memlekettik tabıǵı rezervatynyń aýmaǵynan órt oshaǵy anyqtalmaǵan.
«Departamenttiń jedel kezekshisi 30 qańtarda «Aqjaıyq» memlekettik tabıǵı rezervatyna telefon arqyly habarlasty. Alaıda, rezervat aýmaǵynda eshqandaı órt oqıǵasy tirkelmegeni belgili boldy. Al, «Qazaqstan Ǵarysh Sapary» AQ-nyń ǵaryshtyq monıtorıngi arqyly áýeden barlaý kezinde Atyraý oblysynyń aýmaǵynda eshqandaı órt oshaqtary anyqtalǵan joq. Oblystyń barlyq aýdanynda da deregi tirkelmegen», -dep habarlady departamenttiń qoǵammen baılanys toby.
Keshe, 30 qańtarda jergilikti ýaqytpen saǵat 20:00 -de qarańǵy túsýine baılanysty barlaý jumystary toqtatyldy. Endi búgin, 31 qańtarda Atyraý oblystyq tótenshe jaǵdaılar departamentiniń 15 qyzmetkeri men 3 tehnıkasy órt oshaqtaryn anyqtaý maqsatynda barlaý jumystaryn júrgizetin bolady.
«Atyraý qalasynyń aýmaǵynda 30 qańtarda 6 órt oqıǵasy tirkelgen edi. Oqıǵa ornyna jedel jetken órt sóndirýshiler órt oshaqtaryn ýaqytyly joıdy», -dep málim etti departamenttiń qoǵammen baılanys tobynan.
Eske sala ketelik, buǵan deıin Kaspıı teńiziniń jaǵalaýyndaǵy 3 gektarda qamys órti áli byqsyp jatqanyn habarlaǵan bolatynbyz.