Atyraýda eki kúndik jármeńkede 13 tonna aýyl sharýashylyǵy ónimderi satyldy

ATYRAÝ. QazAqparat – Atyraýda ótken senbi-jeksenbide aýyl sharýashylyǵy taýarlarynyń jármeńkesi ótip, 13 tonna ónim satyldy, dep habarlaıdy QazAqparat.

Atyraý qalasynda 10-11 qazanda úsh jerde aýyl sharýashylyǵy taýaryn óndirýshilerdiń jármeńkesi uıymdastyryldy.

Jármeńkege 59 sharýa qojalyǵy men kásipkerler qatysty.

«Munaıshy» stadıonynyń aldyndaǵy alańda - 26, «Saraıshyq» kommýnaldyq bazarynda - 23, al «Bereke» yqshamaýdanyndaǵy jármeńkede - 10 sharýa qojalyǵy men taýar óndirýshiler qala turǵyndaryna naryqtaǵy qunynan tómen baǵamen sút, kókónis, et jáne ózge de ónimderdi usyndy.

«Eki kúndik jármeńkede 13 tonnaǵa jýyq aýyl sharýashylyǵy ónimderi satyldy» dep habarlady Atyraý qalalyq ákimdiginiń baspasóz qyzmeti.

Eske sala ketelik, budan buryn Atyraýda karantın engizilgeli alǵash ret aýyl sharýashylyǵy jármeńkesi ótkenin habarlap edik.