Atyraýda eki kúnde «Gaýhartas» turǵyn úı kesheninen úsh ret órt shyqty
Oblystyq tótenshe jaǵdaılar departamentiniń qoǵammen baılanys tobynan málim etkendeı, Atyraý qalasyndaǵy «Saryqamys» shaǵyn aýdanynda ornalasqan «Gaýhartas» turǵyn úı kesheninde eki kúnde úsh ret órt shyqqan.
Keshe, 10 shildede saǵat 23:00 shamasynda «Gaýhartas» turǵyn úı keshenindegi páterdiń birinde elektr jelisiniń qysqasha tuıyqtalýynan kir jýatyn mashınka órtengen. Jalyndy turǵyndardyń ózderi sóndirip alǵan.
Al, búgin, 11 shildede saǵat 9:54-te atalǵan turǵyn úı keshenindegi №3 úıdiń páterinen tútin shyǵyp jatqany jóninde habar túsken. Tótenshe jaǵdaılar departamentiniń qutqarýshylary anyqtaǵandaı, órttiń tutanýyna taǵy da elektr jelisiniń qysqasha tuıyqtalýy sebep bolǵan. Órttiń saldarynan turmystyq zattar janyp ketken.
Búgin, túsqaıta saǵat 14:52-de «Gaýhartas» turǵyn kesheninde taǵy bir órt tirkeldi. Jalyn osyndaǵy №3 úıdegi páterdiń 1 200 sharshy metrlik ekinshi qabaty men shatyryn sharpyǵan.
«Departamenttiń órt sóndirýshiler jalyndy saǵat 16:25-te oqshaýlady. Órt saǵat 16:51-de tolyq sóndirildi. Turǵyn úı keshenindegi órt sóndirýge tótenshe jaǵdaılar departamentiniń 40 qyzmetkeri men 10 arnaıy tehnıkasy, polıtsııa departamentinen 20 qyzmetker men 9 tehnıka, «AMÓZ», «Semser-Órt sóndirýshi», «Aqberen» JShS-nen 8 qyzmetker men 3 tehnıka, sondaı-aq, Soltústik Kaspıı ekologııalyq áreket etý bazasynan 4 qyzmetker men 1 tehnıka tartyldy», -dep málim etti depratamenttiń qoǵammen baılanys tobynan.
Eki kún qatarynan tutanǵan úsh órtten zardap shekkender joq. Qazir órttiń ózge de sebebi anyqtalyp jatyr.
Eske sala ketelik, buǵan deıin Teńiz ken ornynda jarylys bolyp, eki adam qaza tapqanyn, jarylys qubyrdyń flanetsti qosylysynyń úzilýinen bolǵanyn habarlaǵan edik.
