Atyraýda eki kúnde 29 avtokóliktiń bólshekterin urlaǵan úsh kúdikti ustaldy
Oblystyq polıtsııa departamentiniń baspasóz qyzmetinen málim etkendeı, kúdikke ilingen úsh adam túngi mezgilde urlyq jasaýǵa shyqqan.
«Atyraý qalasynyń polıtsııa basqarmasyna №2 qalalyq polıtsııa bóliminiń qyzmetkerleri 29 avtokóliktiń bólshekterin jasyryn jymqyrdy degen kúdikpen úsh adamdy anyqtap, ustady. Urlyq jasaǵan úsh kúdikti – Atyraý qalasynyń turǵyndary. Kúdiktiler 25-26 qazan kúnderi túngi mezgilde ártúrli avtokólik bólshekterin, sondaı-aq, kólik ishinde qaldyrylǵan aqshalaı qarajattardy qoldy etken. Jábirlenýshilerge keltirilgen zalal mólsheri – 2,5 mln teńgege jýyq», -dep habarlady departamenttiń baspasóz qyzmeti.
Qazir polıtsııa qyzmetkerleri ustalǵan kúdiktilerge qatysty QR Qylmystyq kodeksiniń 188-babynyń 3-bóliginiń 2,3-tarmaqtaryna sáıkes sotqa deıingi tergep-tekserý amaldaryn júrgizýdi bastady. Kúdiktilerge qatysty 26 qylmystyq is tirkelgen.
Eske sala ketelik, buǵan deıin Atyraýda kólikten 20 mln teńge urlaǵan kúdikti ustalǵanyn habarlaǵan edik.
«Aqtóbe-Atyraý-Reseı Federatsııasynyń shekarasy» baǵytyna qatynaıtyn tas joldyń boıynda turǵan «DAF» markaly aýyr júk kóliginiń salonynan 20 mln 445 myń teńge salynǵan sómke urlanǵan. Qomaqty qarajatty qoldy etken 23 jastaǵy kúdikti Maqat aýdanynyń aýmaǵynan ustaldy. Qazir kúdiktige qatysty QR Qylmystyq kodeksiniń 188-babynyń 4-bóligimen sotqa deıingi tergeý júrip jatyr.