Atyraýda eki kúnde 130-ǵa jýyq adam karantın shekteýlerin buzǵan

ATYRAÝ. QazAqparat – Atyraý polıtseıleri eki kúnde karantın shekteýlerin buzǵan 130-ǵa jýyq azamat pen birneshe saýda ornynyń ıelerin anyqtady, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, 5-6 shildede qatań karantınniń saqtalýyna reıd júrgizilgen.

«Reıd kezinde «Nursaıa» yqshamaýdanyndaǵy úılerdiń biriniń janynda ornalasqan jemis-jıdek satatyn dúńgirshek, osy yqshamaýdandaǵy eki sýpermarket, azyq-túlik dúkeni, samsa satý orny, meıramhana ıelerine qatysty is-qujattar jasaqtaldy. Sonymen qatar, Atyraý oblysynyń bas memlekettik sanıtar dárigeriniń 4 shildedegi qaýlysynyń 5-tarmaǵyndaǵy «senbi, jeksenbi jáne mereke kúnderi jeke avtokólik qozǵalysyna tolyqtaı tyıym salý» týraly shekteýdi buzǵan 127 azamat anyqtaldy» dep habarlady departamenttiń baspasóz qyzmeti.

Jınaqtalǵan qujat sheshim qabyldaý úshin Atyraý qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasyna joldanǵan.

Eske sala ketelik, buǵan deıin Atyraýda kosmetıkalyq klınıka tapshy dári-dármekti zańsyz satyp kelgenin habarlap edik.