Atyraýda eki kólik túıisip, bireýi elektr baǵanasyna soǵyldy
ATYRAÝ. QazAqparat – Atyraý qalasynda eki kólik túıisip, bireýi elektr baǵanasyna soǵyldy, dep habarlaıdy QazAqparat.
Oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy búgin, 8 qarashada, saǵat 9:00 shamasynda bolǵan.
«Atyraý qalasyndaǵy Ernııazov-Qulmanov kósheleriniń qıylysynda eki kólik soqtyǵysyp qaldy. «Lada Priora» markaly avtokóligi ekinshi deńgeıli joldan shyǵyp, basty jol – Ernııazov kóshesimen kele jatqan «Hyundai Solaris» avtokóligimen túıisti. Soqtyǵysýdyń ekpinimen «Hyundai Solaris» avtokóligi jaıaý júrginshiler jolyn jaryqtandyryp turǵan elektr baǵanasyna soǵyldy. Jol-kólik oqıǵasynyń saldarynan jaraqat alǵandar men qaıtys bolǵandar joq» -dep habarlady departamenttiń baspasóz qyzmeti.
Qazir atalǵan jol-kólik oqıǵasyna baılanysty is-qujattary jınaqtalyp jatyr
Eske sala ketelik, buǵan deıin Atyraýda eki kólik soqtyǵyp, 19 jastaǵy jigit mert bolǵan edi.
