Atyraýda eki kólik soqtyǵysyp, júrgizýshi mert boldy
ATYRAÝ. QazAqparat – Atyraýda jol apatynan bir adam qaıtys boldy, dep habarlaıdy QazAqparat.
Kólik apaty oblys ortalyǵyndaǵy Beıbarys pen Taımanov kósheleriniń qıylysynda boldy. Dańǵylda «Porsche Cayenne» men «Volkswagen Polo» kólikteri soqtyǵysty.
«Volkswagen Polo» júrgizýshisi jedel járdem kelgenshe oqıǵa ornynda kóz jumdy. Taǵy eki adam zardap shekti.
Kýágerlerdiń sózinshe, kólikterdiń biri baǵdarshamnyń qyzyl belgisine ótip ketken.
Polıtsııa departamentiniń habarlaýynsha, jol apaty boıynsha, QR QK-niń 345 baby 3-shi bóligi boıynsha sotqa deıingi tergeý júrip jatyr. Atalmysh bap kisi ólimine alyp kelgen jol erejesin buzý, kólikti paıdalaný sııaqty zańbuzýshylyqtardy qarastyrady.
