Atyraýda eki qabatty mansardty úı órtenip ketti
ATYRAÝ. QazAqparat – Atyraý qalasynda eki qabatty mansardty úı órtenip ketti, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń málimetine súıensek, dıspetcherlik pýltke búgin, 20 qyrkúıekte saǵat 13:34-te Atyraý qalasynyń Jumysker shaǵynaýdanyndaǵy 380-d meken-jaıynda ornalasqan turǵyn úıden tútin shyǵyp jatqany týraly habar túsken.
«Departamenttiń órt sóndirýshileri saǵat 13:43-te shaqyrtý ornyna jetip, mansardty turǵyn úı janyp jatqanyn anyqtady. Órtti sóndirýge arnaıy qyzmettiń 15 qyzmetkeri men 3 tehnıkasy jumyldyryldy. Jalyn saǵat 13:59-da oqshaýlanyp, saǵat 14:17-de tolyq sóndirildi. Órtengen aýmaq 180 sharshy metrdi qurady» -dep habarlady departamenttiń baspasóz qyzmeti.
Órtten zardap shekkender men qaza tapqandar joq. Qazir jalynnyń neden tutanǵany anyqtalyp jatyr.
Eske sala ketelik, budan buryn Atyraýda turǵyn úıdiń shatyry órtengenin jazǵan edik.
