Atyraýda eki «Gazel» kóligi órtendi
Oblystyq Tótenshe jaǵdaılar departamenti baspasóz qyzmetiniń málimetinshe, eki kólik te 16 qarashada órtengen.
«Tańerteńgi saǵat 08:26-da Atyraý qalasynyń mańyndaǵy Erkinqala kentinde jolaýshylar tasymaldaıtyn «Gazel» órtendi. Jek ıeliktegi turǵyn úıdiń aýmaǵynda otqa oranǵan kólikti sóndirýge 7 qyzmetker, arnaıy 2 tehnıka, «Pýrga-2» órt sóndirý qondyrǵy jumyldyryldy. Jalyndy óshirý úshin 153 lıtr kóbik shashyldy.
Al ekinshi «Gazel» saǵat 11:40-ta Atyraý qalasyndaǵy Neverov kóshesinde órtendi.
Arnaıy qyzmettiń 5 qyzmetkeri men bir tehnıka jumyldyryldy. «Pýrga-2» qondyrǵysymen 153 lıtr kóbik shashylyp, tilsiz jaý saǵat 11:53-te aýyzdyqtaldy», - dep habarlady departamenttiń baspasóz qyzmeti.
Órt saldarynan zardap shekkender men qaza tapqandar joq.
